کوئٹہ مذہبی یا لسانی انتہاء پسندی کا شکار؟

بلوچستان غیروں کی سازش کے باعث جل رہا ہے اس الاؤ میں بتدریج اضافہ اپنوں کی چشم پوشی ، مصلحت کوشی اور مفادات کے باعث ہورہا ہے، یہ اپنے اسلام آباد کے وہ طبقات ہیں جو اقتدار کے مراکز پر براجمان ہیں جن کے نزدیک پاکستان ان کے ارد گرد کا خطہ زمین ہی ہے اور کثرت آباد ی کی زعم میں مبتلا ہوکر ملک کی سلامتی کو دانستہ طور پر داؤ پر لگائے بیٹھے ہیں ۔جس کا نتیجہ صوبوں اور اقوام کے درمیان نفرت اور عداوت تخم ریزی کا برآمد ہوا ہے ،یہ وہ زہر ہلاہل ہے جس نے ملک کی حیات کو موت کے دہانے پر لا کھڑا کردیا ہے اس زہر کا تریاق جمہور و قانون کی حکمرانی اور آئین و دستور پر اس کی اصل روح کے مطابق عملدرآمد ہے وگرنہ فاصلوں میں اضافہ ہوتا رہے گا ، دوریاں بڑھتی جائیں گی چنانچہ اغیار کو کھل کھیلنے کا مزید موقع فراہم ہوگا ۔ پاکستان میں انتشار کا کھلواڑ کھیلا جارہا ہے ان آتشی حالات کا نظارہ سرحد و بلوچستان میں دیکھا جاسکتا ہے اگر نگاہ با بصیرت ہو ؟ دشمن بلوچستان کی خون آشامی میں اپنا پورا پورا حصہ ڈال رہا ہے ، لاقانونیت اس وقت اپنے عروج پر ہے جس کی زد میں معصوم شہری چلے آرہے ہیں، سیکورٹی فورسز کے اہلکار مارے جارہے ہیں ، کمال ہے کہ حکمران طبقہ ڈیٹ بن کر محض تماشا دیکھ رہا ہے اصلاح احوال کے لئے درست راستے کا تعین نہیں کرپارہے ۔ غیر تو پاکستان کو غیر مستحکم ہی دیکھنا چاہتے ہیں ،بلوچستان کا یہ انتشار کوئی معمولی حکمت عملی کا شاخسانہ نہیں ہے بلکہ اس کی پشت پر دنیا کی بڑی بڑی قوتیں موجود ہیں جنہیں فقط اپنے ہی مفادات عزیز ہیں،ان قوتوں کا مطمع نظر دراصل بلوچستان کا ساحل اور زیر زمین وسائل ہیں شاید کہ ہمارے چند ناداں دوست کسی خوش فہمی میں مبتلا ہوکر استعمال ہورہے ہیں ۔اگر یہ آزادی کی جنگ ہے تو یاد رہے کہ یہ جنگ خاکم بدہن پاکستان ٹوٹنے کے بعد بھی جاری رہے گی اور محرومیوں کا یہ ماتم رُکے گا نہیں ۔
واضح دکھائی دے رہا ہے کہ بلوچستان لسانی ٹکراؤ کی طرف بھی بڑھ رہا ہے ۔مزید برآں بعض قوم پرست جماعتیں غیر کے کہنے پر چاہتی ہیں کہ کوئٹہ تخت و تاراج ہو ۔ طالبانائزیشن کے پھیلاؤ کا ”ہوا“ کھڑا کیا جارہا ہے، کوئٹہ اور شمالی بلوچستان میں طالبان کی موجودگی کے اشارے حکومت پاکستان کی بجائے افغانستان میں امریکہ کی سرخیلی میں موجود عالمی جارح قوتوں کو دیئے جاتے ہیں تاکہ حکومت پاکستان کو کوئٹہ میں آتش و آہنگ کا بازار گرم کرنے پر مجبور کیا جاسکے اورڈرون کی بلا بھی شہر کوئٹہ اور صوبے کے دیگر علاقوں میں بے گناہوں پر چھوڑی جائے۔یہ حضرات اپنے طور پر نشاندہی کرچکے ہیں کہ کوئٹہ کے فلاں فلاں علاقے طالبان کا گڑھ ہیں۔ پشتونخوا ملی عوامی پارٹی، بلوچستان نیشنل پارٹی(مینگل) ، نیشنل پارٹی کے علاوہ جملہ بلوچ قوم پرست جماعتیں بطور خاص کوئٹہ میں طالبان کی موجودگی کی بانسریاں بجاتی ہیں ۔ خیر سے محمود خان اچکزئی کی جماعت کی آواز کچھ مدھم ہوگئی ہے وجہ معلوم نہیں کہ یہ اچانک یو ٹرن کیوں لے لیا گیا ؟ البتہ مذکورہ بالا دیگر جماعتیں ہنوز طالبان کی موجودگی کا ڈول پیٹ رہی ہے اور تو اور تبلیغی جماعت سے بھی شاکی و خوفزدہ ہیں ۔ ان کے صاحبان عقل و دانش کے بقول منصوبہ بندی کے تحت بلوچ سیکولر معاشرے کو انتہاء پسندی کی راہ پر لے جایا جارہا ہے حالانکہ بلوچ انتہاء پسندی تو اب روز روشن کی طرح عیاں ہے پھر تبلیغی جماعت والے تو پاکستان بلکہ پوری دنیا میں پھیلے ہوئے ہیں تو کیا یہ سب آئی ایس آئی کی پالیسی کے تحت ہورہا ہے ؟ ۔
بات ہورہی تھی طالبان کی موجودگی اور نقل و حمل کی تو اس ضمن میں سیاسی سطح کے علاوہ اخبارات کے اداریوں ، مضامین اور خطوط کے ذریعے بھی افغانستان پر قابض قوتوں کو باور کرایا جاتا ہے کہ طالبان کوئٹہ کے ان ان علاقوں میں موجود ہیں۔ اس تناظر میں معاصر انگریزی اخبار”ڈیلی ڈان“ میں ایم پوپلزئی ار شریف کاسی نامی افراد نے بیس مارچ دو ہزار دس ایڈیٹر کے نام خط میں کوئٹہ میں طالبانائزیشن کے حوالے سے اپنی تشویش کا اظہار کیا ہے یہ نام فرضی لگتے ہیں یا پھر ہم خیال ہوں گے ۔یہ تحریر اسی منصوبہ بندی کا حصہ ہے جس کا سطور بالا میں ذکر ہوا ہے کیونکہ نیتوں کے فطور عیاں ہوہی جاتے ہیں۔بہر کیف فتنہ پرور خیر خواہوں کا ڈان کے ایڈیٹر کے نام خط کا لب لباب یہ ہے کہ کوئٹہ میں ٹارگٹ کلنگ اور اغواء برائے تاوان کی وارداتوں کا تعلق طالبان سے ہے اور طالبان پشتونوں ، بلوچوں اور ہزارہ اقوام کے فطری دشمن ہیں۔ خط میں مسلح کارروائیوں کے حوالے سے ضمنی طور پر ذکر بلوچ قوم پرستوں کا بھی کیا گیا ہے مگر مراد اس تحریر کی یہ ہے کہ طالبان کی موجودگی کو یقینی بناکر بڑی قوتوں کو حملے کا جواز فراہم کیا جائے۔
مزید مبالغہ آرائی ملاحظہ ہو ، تحریر میں کہا گیا ہے کہ 2001ء کو افغانستان پر امریکی حملے کے بعد پاکستان آنے والے طالبان نے بہت ساری زمینیں قبضہ کرلیں اور یہاں نو گو ایریاز قائم ہوگئیں یہ علاقے افغانستان پر حملوں کے لئے بیس کیمپ کے طور پر استعمال ہوتی ہیں۔ یہ بھی بتایاگیا ہے کہ حافظ مجید کوئٹہ شوریٰ کے لیڈر ہیں جن علاقوں کو نو گو ایریاز قرار دیا گیا ہے ان میں کوئٹہ شہر کا علاقہ پشتون آباد، کاکڑ کالونی، اسی طرح مشرقی و مغربی بائی پاس شامل ہیں ساتھ ان علاقوں کی نشاندہی اس طرح بھی کی گئی ہے کہ ان علاقوں کو طالبان اپنی سرگرمیوں کے لئے استعمال کرتے ہیں ۔ مزید یہ کہا گیا ہے کہ ہلمند آپریشن کے بعد بھی طالبان کوئٹہ آئے اور سرکاری و غیر سرکاری زمینوں پر قبضہ کرلیا۔ آخر میں حکومت پاکستان کو مخلصانہ تجویز دیتے ہوئے یہ تحریر کیا گیا ہے کہ مشرقی بائی پاس کے مقبوضہ زمینوں کو خالی کراکر تعلیمی اور صنعتی زون قرار دے کر تری دی جائے ۔ “ ڈان کی اس تحریر کو بنیاد بناکر کوئٹہ کے ایک مقامی روزنامہ ”آزادی“ نے بھی اپنے اداریے (23مارچ2010ء )میں تشویش کا اظہار کردیا بلکہ تشویش کچھ زیادہ ہی نمایاں تھی کہ یہ آباد کاری بلوچوں کو اقلیت میں تبدیل کرنے کے لئے کی جارہی ہے ۔ بہر حال ہمیں اس سے کوئی غرض نہیں کہ کون اقلیت میں ہے اور کون اکثریت البتہ غرض طالبان کی موجودگی اور نو گو ایریاز کے حوالے سے لوگوں کی بے چینی کا ضرور ہے، اولاً عرض یہ ہے کہ مشرقی بائی پاس گنجان آباد علاقہ ہے جہاں بلوچ اور پشتون دونوں اقوام آباد ہیں یہاں زمینوں کا تنازعہ قبائل کے درمیان ہوا تھا جو کہ اب حل ہوگیا ہے مشرقی بائی پاس میں پشتونوں کے مقامی قبائل مندوخیل، بڑیچ، اچکزئی، خلجی ، کاکڑ،نورزئی اور علیزئی آباد ہیں اسی مشرقی بائی پاس پر علامہ اقبال اوپن یونیورسٹی موجود ہے اسی کیساتھ تعمیر نو ایجوکیشنل کمپلیکس بھی موجود ہے جو ہر طرح سہولیات سے آراستہ ارادہ ہے جس کے پرنسپل ممتاز ماہر تعلیم پروفیسر فضل بار ی کو22مارچ کو مشرقی بائی پاس پر نامعلوم افراد نے فائرنگ کرکے قتل کردیا اور ذمہ داری بلوچ لبریشن آرمی نے قبول کرلی۔ اس واقعہ کے بعد مذکورہ تعلیمی ادارے کے اساتذہ نے عدم تحفظ کے باعث مزید پڑھانے سے انکار کردیانتیجہ یہ نکلاکہ تعمیر نو ٹرسٹ بلوچستان نے مشرقی بائی پاس پر موجود ایک عظیم ادارے کو بند کردیا ،اس ادارے میں ایک ہزار سے زائد طلباء زیر تعلیم تھے اور سینکڑوں طلباء ادارے کے ہاسٹل میں رہ رہے تھے ۔ اس ادارے کو آئندہ سالوں میں یونیورسٹی کا درجہ دیا جارہا تھا اور اسے ایجوکیشنل سٹی میں تبدیل کئے جانے کی منصوبہ بندی مکمل کرلی گئی تھی اس ادارے کے قیام سے علاقے میں تعلیم کے فروغ کے حوالے سے مثبت تبدیلی کے آثار نمایاں ہوگئے تھے ۔ تعمیرنو ٹرسٹ کے زیر انتظام تعلیمی اداروں کا معیار کا یہ عالم ہے کہ لوگ اپنے بچوں کو ان اداروں میں داخل کرانے کے لئے کیا کیا پاپڑ نہیں بیلتے اور لائق و خوش نصیب طلباء کو داخلے ملتے ۔اب ذرا بتایا جائے کہ مشرقی بائی پاس کو تعلیمی اور صنعتی زون بنانے کا مطالبہ کرنے والے اس ادارے کی بندش کے ذمہ دار ہیں یا طالبان ؟، جو سرے سے موجود ہی نہیں ۔ یاد رہے کہ علاقے کے لوگ کاروبار پیشہ اور محنت مزدوری کرنے والے ہیں۔ اسی طرح پشتون آباد، خروٹ آباد اور کاکڑ کالونی وہ علاقے ہیں جہاں ایف سی کی کوئی چوکی قائم ہے نہ ہی پولیس کی ،بطور خاص پشتو ن آ ٓباد اور کاکڑ کالونی کوئٹہ کے پرامن علاقے ہیں ۔ کوئٹہ میں زمینیں بے وارث نہیں پڑیں جسے کوئی بھی آکر قبضہ کرے بلکہ یہاں کی زمینیں قبائل کی ملکیت ہے ۔ پشتون آباد، خروٹ آباد اور کاکڑ کالونی کے علاقوں میں قانون کی مکمل عملداری قائم ہے اور لوگ قانون کا احترم کرنا بھی جانتے ہیں ۔ واضح ہو کہ شہر میں ٹارگٹ کلنگ کے واقعات کے بعد اردو اور پنجابی بولنے والے مزدور اور ملازمت پیشہ افراد کاکڑ کالونی اور پشتون آباد میں بھی رہائش اختیار کررہے ہیں وہ اس لئے کہ یہ علاقے پرامن ہیں۔
رہی بات کہ طالبان کے بیس قائم ہیں یہ عقل سے ماورا ء الزام ہے جس پر کسی دلیل کی ضرورت وقت کا ضیاع ہوگا۔ تاہم کوئٹہ شہر میں نو گو ایریاز ضرور موجود ہیں ،وہ سریاب اور چند دوسرے علاقے ہیں جہاں بلوچ مزاحمت کاروں(ٹارگٹ کلرز) کی خوف سے رات کے اوقات میں کیا دن کو بھی اردو اور پنجابی بولنے و الوں کے علاوہ ہزارہ برادری کے افراد جانے سے کترانا تو دور کی بات سرے سے جاتے ہی نہیں ۔ ہم توکوئٹہ میں طالبان کی موجودگی تسلیم نہیں کرتے لیکن نام نہاد متعصب دانشوروں نے ٹارگٹ کلنگ کا الزام بھی طالبان پر عائد کردیا۔ الزام غلط بے جا ہی نہیں بلکہ سفید جھوٹ ہے ۔ کوئٹہ شہر میں فرقہ وارانہ وارداتیں تسلسل کے ساتھ ہورہی ہیں ان میں کالعدم تنظیم لشکر جھنگوی ملوث ہے جس سے منسلک افراد کوئٹہ اور بلوچستان کے مغربی علاقوں سے تعلق رکھتے ہیں۔ باقی سیکورٹی فورسز اور اردو و پنجابی بولنے والے اساتذہ، مزدوروں اور سرکاری ملازمین کو قتل کی ذمہ داری کوئی نہ کوئی بلوچ مسلح تنظیم قبول کرتی رہتی ہے ۔
بلوچستان کے پشتون علاقوں کی بڑی پارلیمانی جماعت جمعیت علمائے اسلام ہے جن کے ہر دور حکومت میں بطور خاص پشتون علاقوں میں تعلیمی ادارے تعمیر کئے گئے ہیں آج تک کسی کالج یا اسکول پر کسی نے پتھر تک نہیں پھینکا، نوجوان نسل زیور تعلیم سے آراستہ ہورہی ہے مگر افسوس کہ طلباء و اساتذہ کی ٹارگٹ کلنگ کے باعث کیڈٹ کالج مستونگ ، خضدار انجینئرنگ یونیورسٹی، خضدار ریذیڈنشل کالج کے علاوہ دیگر تعلیمی ادارے تباہی کے دہانے پر پہنچ گئے ۔ ایک بے سرو پا الزام جہادی تنظیموں اور طالبان پر کوئٹہ شہر میں اغواء برائے تاوان کی وارداتوں کا بھی لگایاگیا ہے چنانچہ اس پر اتنا ہی کہا جاسکتا ہے یہ حقیقت کسی سے پوشیدہ نہیں کہ کوئٹہ شہر میں اغواء برائے تاوان کی وارداتوں میں کون لوگ اور گروہ ملوث ہیں اور کن پہاڑی سلسلوں میں تاوان کی ادائیگی تک رکھا جاتا ہے ،اُن لوگوں سے جو تاوان ادا کرنے کے بعد گھروں کو لوٹ آئے ہیں ،پوچھا جائے کہ اغواء کاروں کون تھے؟۔ڈی آئی جی آپریشن حامد شکیل بھی کہہ چکے ہیں کہ اغواء برائے تاوان کی وارداتوں میں اکیس گروہ ملوث ہے جن میں سے انیس گروہ کے متعدد ارکان کو گرفتار کیا جاچکا ہے اور یہ تمام مقامی افراد ہیں۔ ان حضرات کا مقصد اپنے آقا امریکہ کو کوئٹہ میں انتشار پھیلانے کے لئے جواز فراہم کرنا ہے تاکہ ان کے فتنہ ذہنی اور تعصب کو سکون میسر ہو۔
مذکورہ اخبار نے کسی کند نا تراش کے بے میل و سر و پا الزامات پر معاً ادارایہ تحریر کیا ،شہر میں خرابی و قتل عام کا الزام طالبان کے سر تھوپ دیا ۔اسی اخبار کے کسی ادارے اور خصوصی رپورٹ میں ہم نے کسی بے کس پنجابی اور اردو بولنے والے معلم ، مزدور اور ملازم کی ٹارگٹ کلنگ کی مذمت کے الفاظ نہیں پڑھے۔ اس گلشن کو اسلام آباد کے مقتدر طبقات کے علاوہ اپنے بھی تباہ و ویران کرنے پر تلے ہوئے ہیں ،الزام لگایا جاتا ہے کہ بلوچستان میں آرمی مبینہ طور پر آپریشن کرکے بلوچوں کا قتل عام کررہی ہے مگر افسوس کہ یہی قوتیں امریکہ کو کوئٹہ اور شمالی بلوچستان پر ڈرون حملوں کی ترغیب بھی دے رہی ہیں ۔
خلاصہ کلام یہ ہے کہ طالبان اپنے ملک افغانستان میں قابض قوتوں کے خلاف آزادی کی جنگ لڑرہے ہیں وہ کوئی لینڈ مافیا نہیں کہ کوئٹہ میں آئے اور کسی کی زمینوں پر قبضہ کرے اور تحصیل ، تھانہ و کچہریوں کے چکر لگائے اور پٹواریوں کو جیب خرچہ دے کر خوش کرتا پھرے ۔

پاکستان افغانستان ،دو قالب یک جان ؟

تحریر: اخوندزادہ جلال نورزئی

پاکستان اور افغانستان کے لئے نعرہ لگایا جاتا تھا کہ دونوں ممالک دو قالب یک جان ہے ۔1992ء میں سرخ افواج (روسی) جب شرمندہ و نامراد ہوکر دریائے آمو پار کرکے صدمے سے دو چار تھکے ہارے اپنے وطن کو لوٹ گئیں ۔ اپریل1978ء میں ”خلقیوں“ نے افغان صدر سردار داؤد کو معہ پورے خاندان تہ تیغ کیا ان کی نسل مٹادی اور افغانستان میں سوشلسٹ انقلاب کانعرہ مستانہ بلند کیا اس کے ساتھ انقلابیوں نے کشت و خون کا بازار گرم کردیا کابل کی گلیاں خون سے لالہ زار کردی گئیں اس انقلاب کے لئے روس نواز افغان جماعتیں مری جارہی تھیں۔ تعلیمی اداروں میں کمیونزم کی تبلیغ کی جاتی تھی حتیٰ کہ ان گمراہ افغان کمیونسٹوں کے اجتماعات میں جب کوئی دوشیزہ خطاب کے جوہر دکھانے اسٹیج پر آتی تو سامع نوجوانوں کو جوش ولولہ دیتیں اور ان کی دل لبھائی کے لئے کہتیں کہ جو نوجوان کمیونسٹ انقلاب کا نقیب ثابت ہوگا تو یہ سرخ رسیلے ہونٹ اس کا انعام ہوگا۔ انجام کار انقلابی آپس میں دست و گریبان ہوگئے ، اقتدار کی رسی کشی میں ایک دوسرے کا قتل عام کیا گیا نور محمد ترہ کئی جو اس فساد کے سرخیل کے طور پر نمودار ہوا اس مناقشہ میں قتل کردیئے گئے اور یہ کار خیر کسی جہادی تنظیم نے نہیں کیا ان دنوں تو انقلابی ایک دوسرے کے خون کے پیاسے تھے جہاد اور مزاحمت دور دور تک دکھائی نہیں دے رہی تھی بلکہ فسادیوں کی چپقلش جاری تھی نور محمد تروہ کئی کو حفیظ اللہ امین نے راستے سے ہٹادیا اسی طرح حفیظ اللہ امین بھی ابد کی گہری نیند سلادیئے گئے ۔ کہا کرتے تھے کہ افغانستان میں موروثی سیاست کا خاتمہ کردیا گیا ، مذہبی انتہاء پسندی کی گنجائش نہیں رہی دقیانوس نظام کی بجائے مساوات کا نظام آچکا ہے حیرانگی کی بات ہے کہ سویت یونین کے یہ خدمت گزار ایک دوسرے پر ایجنٹ کے الزامات بھی لگاتے تھے اس ضمن میں حفیظ اللہ امین کو امریکی سی آئی کارنددہ کہا جاتا تھا۔ افغانستان میں فساد اور غیر یقینی حالات کا خشت اول انہی حضرات نے رکھا پھر ہو ایہ ہے کہ حفیظ اللہ امین کے بعد ببرک کارمل روسی ٹینکوں پر سوار دار الخلافہ کابل میں داخل ہوا۔ نور محمد ترہ کئی اور ڈاکٹر نجیب اللہ کی حکومت تک سرحد پار سے لوگ اس کمزور اور بے معنی انقلاب کے لئے مرے جارہے تھے انہیں اچھی طرح ادراک تھا کہ افغان معاشرے میں ایسی کوئی بھی تبدیلی جس کی بنیاد ترک مذہب یا مذہب بیزاری پر ہو قبول نہیں کی جائے گی ، ان کو تاہ چشم ٹولوں کو فقط اس خواہش اور امید نے حصار میں لے رکھا تھا کہ شاید کسی طرح افغانستان سے مذہب کا خاتمہ ہو حالانکہ ایسا ہو نہیں سکتا بلکہ کل کی طرح آج بھی نا ممکن ہے

۔افغانستان کی تاریخ گواہ ہے کہ جب بھی کسی حملہ آور یا قابض قوت کا مقابلہ کیا گیا ہے تو وہ دینی حمیت کی بنیاد پر ہوسکا ہے ۔ یہ امر ملحوظ رہے کہ پہلی افغان جنگ1849ء تا1842ء اور دوسری انگریز افغان جنگ 1878ء اسی طرح تیسری بار انگریزو ں کے ساتھ1919ء کی جنگ میں مذہب کا عنصر بہ درجہ اتم موجود تھا،یہ جنگیں افغان یا پشتون قومیت کی بنیاد پر نہیں لڑی گئی تھیں بلکہ انگریز کے خلاف جہاد کا علم بلند ہوا اس استقامت عزم اور حوصلے کی بنیاد پر انگریز زیادہ دیر اپنا قبضہ جمانے میں بار بار ناکام رہے، یقین سے کہا جاسکتا ہے کہ اگر روسیوں کے خلاف جہاد نہ ہوتا اور مخالفت میں فقط نیشنلزم میدان میں ہوتی تو نہ صرف روسی اور اس کے ماتحت آسانی سے حکومت کرتے بلکہ گرم پانیوں تک آنکھوں میں جو خواب سجا رکھے تھے ،ممکن تھا کہ وہ بھی شرمندہ تعمیر ہوتا ،امریکہ تو کیا ،چاہے پوری دنیا کی کمک اور حمایت روس کی مخالفت میں دستیاب ہوتی پھر بھی روس کے ایک سپاہی کا بال بھیگا نہ ہوتا ۔ یہ ایک تاریخی حقیقت ہے جس کا ادراک لبرل اور سیکولر افراد کو ہونا چاہیئے ۔ یہی وجہ تھی کہ ڈاکٹر نجیب اللہ نے اپنا قبلہ تبدیل کرنے کی سعی کی اور جا بجا اپنی تقریروں میں قرآن وحدیث سے حوالے دیتا رہا گویا افغان عوام اور مجاہدین کو یہ باور کرانا تھا کہ کمیونزم پر ایمان اگر تھا تو وہ نور محمد ترہ کئی ، حفیظ اللہ امین اور ببرکارمل کو تھا ، جو اب نہیں رہیں اور کابل کے قصر صدارت میں اب ایک کمیونزم بیزار صدر براجمان ہے ۔ سوچ اور حیرت کی بات ہے کہ ایک پرامن افغان حکومت کو جب نور محمد ترہ کئی نے توپوں اور ٹینکوں کے گولوں سے بے قرار کیا تو کسی نے اس کی مذمت کی اور نہ ہی اس وقت کوئی خفگی اور ناراضگی کا اظہار ہوا ،جب سردار داؤد کے پورے خاندان کو نسیت و نابود کردیاگیا تواس عمل پر اس لئے خاموشی کا مظاہرہ کیا گیا کہ انقلاب کے لئے بسا اوقات اس نوعیت کی سفاکی کا مظاہرہ کرنا ضروری ہوتا ہے یعنی نیکی پھیلانے کے لئے اگر خون بہایا جائے تو اس میں کوئی مضائقہ نہیں ۔چنانچہ اس عمل کا ارتکاب جب طالبان سے سرزد ہوا جنہوں کابل پر قبضہ کے بعد ڈاکٹر نجیب اللہ کو لٹکایا تو پاکستان میں موجود خیر خواہوں نے ہا ہا کار مچادی ۔ طالبان کے اس اقدام کو درندگی دہشت اور وحشت سے معمور عمل قرار دیا۔ ڈاکٹر نجیب اللہ کی غائبانہ نماز جنازہ ادا کی گئی ۔حالانکہ اگر دیکھا جائے تو طالبان نے بھی انقلاب برپا کردیا اور وہ بھی فساد کے دور میں ،جب ہر طرف انارکی ، بدامنی ،لوٹ مار اور مردم کشی کا بازار گرم تھا، جنگی کمانڈروں کی بد معاشی کا چلن عام تھا ،کسی کی مال و عزت محفوظ نہ تھی ، صرف اسپین بولدک سے قندھار شہر تک129 ناکے جنگی کمانڈروں نے قائم کر رکھے تھے اور ان تمام مقامات پر ٹرانسپورٹروں کو ٹیکس ادا کرنا پڑتا تھا ۔ایسے میں خاک نشین طالبان نے اگر اصلاح کا بیڑہ اٹھایا تو فساد کے اس عالم میں یہ انقلاب ہی تھا جو طالبان نے برپاد کردیا ۔ اگر نور محمد ترہ کئی کے نزدیک سردار داؤد کو قتل کرنا ان کے انقلاب کے لئے لازم تھا تو ڈاکٹر نجیب اللہ کو قتل کرکے طالبان نے کونسا برا کام کیا ؟۔ دراصل ڈاکٹر نجیب اللہ بھی تو خلقیوں اور پرچمیوں کے نظام فساد کا، کارندہ ہی تھا ، یہی نہیں نور محمد ترہ کئی نے سینکڑوں ہزاروں افراد کو محض اس لئے تہہ تیغ کیا کہ وہ ان کے انقلاب کے مخالف تھے ، ان سے مزاحمت کا خدشہ تھا ۔ سردار داؤد بھی مخالفین پر ہاتھ صاف کرتے رہے۔ معنی کہ سردار داؤد کو بھی بطور خاص مذہبی جماعتوں سے پر خاش تھی ، وہ خوف میں مبتلا تھے گویا باقی تمام شرو فساد جائز ، بس مذہبی لوگوں کو بر سر اقتدار نہیں آنا چاہیئے ۔ بات یہ ہے کہ افغانستان کو مطلوب امن طالبان نے فراہم کیا ،امریکہ اور نیٹو ممالک کی90ہزار عساکر جدید اسلحہ سے لیس ہوکر بھی افغانستان کو تبدیل نہیں کرسکی ہیں ۔ امریکہ کی تیس ہزار افواج بھی آتی ہیں تو حالات جوں کے توں رہیں گے۔ دریا آمو کو عبور کرتے ہوئے روسی افواج بڑی ہشاش بشاش تھیں تاہم جب اسی دریا آمو کی سمت روس کی شکستہ فوج افغانستان سے گام گام نکل رہی تھی تو دنیا کو ان پر ترس آرہا تھا اور اور روسیوں کا انجام تاریخ کا عبرتناک باب ثابت ہوا۔ یہی شرمندگی انگریز استعمار کے نامہ اعمال میں افغان حریت پسندوں نے نوشتہ کردیا ہے بعینہ امریکہ اور اس کے جنگی یارو(نیٹو ممالک) کے ساتھ ہونے والا ہے ۔

خلاصہ کلام یہ ہے کہ روسیوں کے جانے کے بعد مجاہدین کی حکومت جیسی تیسی تھی پاکستان کی خیر خواہ تھی۔ مابعد1994 سے8اکتوبر2001ء تک طالبان دورحکومت میں ،افغانستان پاکستان دوست ملک تھا اور یہ جملہ بطور خاص طالبان کے چند سالہ دور اقتدار پر صادق آتا ہے کہ دو قالب یک جان ،پاکستان ،افغانستان!

بلوچستان کے بگڑتے حالات اور حکومتی عدم توجہی

ملک جن حالات سے آج کل دو چار ہے اس سے وطن کا کوئی بھی باسی بے خبر نہیں ۔افواج پاکستان مالا کنڈ ڈویژن کے بعد اب جنوبی وزیرستان میں آپریشن راہ نجات میں مصروف ہے ۔ رب ہی بہتر جانتا ہے کہ آیا راہ نجات آپریشن سے فی الواقعی دہشت گردی اور غریب کاری سے نجات حاصل ہوسکے گی ؟ بہر حال ایک آزمائش اور امتحان ہے جس میں من حیث القوم ہمیں مبتلا کردیاگیا ہے ۔سوال یہ ہے کہ کیا آپریشن راہ نجات کے بعد امریکہ پاکستان کی کارکردگی سے مطمئن ہوگا ؟ سردست لگتا ایسا نہیں ہے ۔امریکہ افغانستان میں پاﺅں جمانے کی خاطر پاکستان کو انتشار ، بدامنی اور لاقانونیت کے دلدل میں دھنساتا جارہا ہے شاید اس ضمن میں انہیں کافی حد تک کامیابی بھی حاصل ہوئی ہے ۔ ساتھ بلیک واٹر اور امریکی مداخلت بھی ایک سنگین اور قابل توجہ مسئلہ ہے لہٰذا راہ نجات کی ضرورت اس تناظر میں بھی محسوس کرنی ہوگی ۔اس پورے کھیل میں بلوچستان کو بھی غیر معمولی حیثیت حاصل ہے تاہم اس جانب تساہل کا مظاہرہ دیکھنے کو مل رہا ہے صوبے کی حساس اور تشویشناک صورتحال سے چشم پوشی اور پہلو تہی کے مزید خطرناک نتائج برآمد ہوں گے ۔وزیراعلیٰ بلوچستان نواب اسلم رئیسانی فرماتے ہیں کہ ملک کے دیگر حصوں سے بلوچستان کی صورتحال بہتر ہے یہ طفل تسلی ہے جو خود کو دی جارہی ہے ۔بلوچستان کو نسبت دینے کی ضرورت نہیں ہے یہ صوبہ بجائے خود آتش فشاں پر ہے جس کی چنگاریاں بھڑک رہی ہیں کسی غفلت اور خوش فہمی کے نتیجے میں اس آتش فشاں کے شعلے پھر شاید کسی کے قابو میں نہیں آئیں گے ۔بلوچستان میں علیحدگی کی سوچ کو تقویت د ی جارہی ہے نیز صوبے کو لسانیت کی بنیاد پر تصادم کی راہ پر لگانے کی کوششیں کی جارہی ہیں۔ جمعیت علمائے اسلام بلوچستان کے امیر سینیٹر مولانا محمد خان شیرانی نے اس جانب توجہ د لائی ہے ان کا کہنا ہے کہ ” کیری لوگر بل میں انسداد خانہ جنگی کے لئے بھی فنڈ مختص کیا گیا ہے جبکہ پاکستان میں اس وقت کوئی خانہ جنگی نہیں لہٰذا بل کے اس شق سے ظاہر ہوتاہے کہ امریکہ پاکستان میں خانہ جنگی کی صورتحال پیدا کرنا چاہتا ہے اور قبائلی لشکروں کی شکیل اس سلسلے کی کڑی ہے ،دشمن بلوچستان میں پاﺅ جمانے کی کوشش کررہا ہے “۔

یقینا بلوچستان کی صورتحال کو نازک ہے امریکہ کوئٹہ سمیت صوبے کے مختلف علاقوں میں اپنے مقاصد کی تکمیل کے لئے کارروائی کی نیت رکھتا ہے جس کی معاونت یہاں کی قوم پرست جماعتیں کررہی ہیں حالانکہ بلوچستان میں کوئی مذہبی انتہاءپسندی ا ور دہشت گردی کے مراکز موجود نہیں ہیں ،نا ہی اس نوعیت کی کوئی سرگرمی دکھائی دیتی ہے ۔البتہ انتہاءپسندی اگر ہے تو وہ لسانی اور قومی بنیادوں پر پائی جاتی ہے ، قومی حقوق کے نام پر متشدد جدوجہد ہورہی ہے اور اس دوران پولیس اور سیکورٹی فورسز کے علاوہ آباد کاروں کوقتل کیا جارہا ہے ۔ بلوچستان کے وزیر تعلیم شفیق احمد خان اسی مسلح جدوجہد کی بھینٹ چڑھ گئے اور مزید بھی بہت کچھ ہونے والا ہے ۔ اس حوالے سے حکومت یہ بتارہی ہے کہ بلوچستان کے حالات میں بھارت ملوث ہے وفاقی وزیر داخلہ رحمان ملک فرماتے ہیں کہ ان واقعات میں ملوث لوگ رقم لیکر یہ کام کرتے ہیں۔ بہر حال اب تک بہت سارا نقصان ہوچکا ہے ، پنجاب سے تعلق رکھنے والے افراد کو بطور خاص ہدف بناکر مارا جاتا ہے تعلیمی اداروں کے ملازمین اور اساتذہ قتل ہوچکے ہیں ۔ 5نومبر کو جامعہ بلوچستان کے بعد لائبریری سائنس کے چیئرمین پروفیسر خورشید انصاری کو اپنی رہائشگاہ کے قریب قتل کیا گیا پروفیسر خورشید انصاری عشاءکی نماز کی ادائیگی کے لئے گھر سے نکلے چند ہی قدم کے فاصلے پر موٹر سائیکل سواروں نے ان پر گولیاں برسائیں انہیں پانچ گولیاں لگیں جس کے نتیجے میں وہ موقع پر ہی خالق حقیقی سے جاملے۔ خورشید انصاری 1985ءسے بلوچستان یونیورسٹی میں تدریسی خدمات سرانجام دے رہے تھے ، ان کا آبائی تعلق لاہور سے تھا تاہم انہیں کوئٹہ میں سپردخاک کردیا گیا ۔ یونیورسٹی کی انتظامیہ کی جانب سے تین یوم سوگ اور تدریسی عمل معطل کیا گیا قتل کے اس واقعہ کی ذمہ داری بلوچ لبریشن آرمی (بی ایل اے) نے قبول کرلی۔ گزشتہ سال اپریل میں بلوچستان یونیورسٹی کے پرو وائس چانسلر ڈاکٹر صفدر کیانی کو بھی نامعلوم افراد نے گھر کے سامنے فائرنگ کرکے قتل کردیا تھا ۔اسی طرح رواں سال (24جولائی کو )کوئٹہ کے سریاب روڈ پر گورنمنٹ ڈگری کالج میںکمیسٹری کے پروفیسر پروفیسر غلام سرور کو گھر کی چوکھٹ پر فائرنگ کر کے قتل کیا گیا ۔23جولائی کو سریاب روڈ پر واقع سریاب مل میں گورنمنٹ بوائز ہائی سکول کے وائس پرنسپل حاجی محسن انصاری صبح ا سکول کے گیٹ کے سامنے نامعلوم افراد کی فائرنگ سے جاں بحق ہو ا۔یاد ش بخیر !محسن انصاری پروفیسر خورشید انصاری کے رشتہ دار تھے ۔مزیدبرآںکامرس کالج کوئٹہ کے پرنسپل پروفیسر امانت علی کو 23جون2009ءکی صبح کالج کے مرکزی دروازے پر گاڑی سے اترتے ہوئے طلباءکے سامنے نامعلوم افراد نے گولیوں کا نشانہ بنایا اسی طرح مستونگ اور خضدار میں بھی سکول اور کالج کے اساتذہ کو قتل کیا گیا ہے جبکہ زندگی کے دیگر شعبوںسے تعلق رکھنے والے دیگر کئی افراد بھی نادیدہ افراد کی گولیوں کا نشانہ بن چکے ہیں ان واقعات میںجاں بحق ہونےوالے افراد کے اعداد و شمار اگر سینکڑوں میں بیان کئے جائیں تو مبالغہ نہ ہوگااور یہ کوئی پوشیدہ امر نہیں ہے بلکہ بلوچ مسلح تنظیمیںمختلف مواقع پر ان وارداتوں کی ذمہ داری قبول کرتی رہی ہیں جو ان واقعات کواپنے مقصد کی تکمیل کا ذریعہ بیان کرتے اور سمجھتے ہیں اور یہ ارادہ ظاہر کرتے ہیں کہ آئندہ بھی اس نوع کے مقاصد کے حصول کے لئے سر گرم رہیں گے ۔حد تو یہ ہے کہ کوئٹہ میں لڑکیوں کے سکول پر بھی دستی بم حملہ کیا گیا اس واقعہ میں سکول کی تین استانیاں زخمی ہوگئیں ۔یہ کوئٹہ اور شاید صوبے میںاپنی نوعیت کا پہلا واقعہ ہے عام طور پر یہ توقع طالبان یا دانست میں مذہبی انتہاءپسندوں سے کی جاتی ہے لیکن معروضی تجزیہ یہ بتاتا ہے کہ کوئٹہ یا صوبے کے کسی دوسرے علاقے میں مذہبی عناصر کی جانب سے اس نوعیت کا کوئی واقعہ نہ وقوع پذیر ہوا ہے اور نہ ہی کوئی امکان پایا جاتا ہے ۔ اگرچہ منو جان روڈ پر واقعہ ہدہ گرلز ہائی سکول پر دستی بم حملے کی ذمہ داری کسی تنظیم نے قبول نہیں کی لیکن عام طور پر یہ سمجھا جاتا ہے کہ یہ کارروائی صوبے کی کسی مسلح تنظیم کی جانب سے کی گئی ہے ممکن ہے کہ یہ عام تاثر درست نہ ہو ۔اسی روز (7نومبر2009ئ) شہر کے وسط میں واقع میزان چوک پر ایف سی چیک پوسٹ کے قریب بم حملے میں چودہ افراد زخمی ہوگئے جن میں ایک سیکورٹی اہلکار اورتین بچے بھی شامل تھے ۔زخمی ہونے تمام کے تمام مزدور کار اور غریب لوگ تھے جو اس چوک پر تھڑو ں پر یا ریڑھیاں لگا کر معاش کے حصول کے لئے موجود تھے ۔ ان واقعات میں آباد کاروں کو نشانہ بنایا جاتا ہے لیکن ظاہرہے کہ فائرنگ اور بم حملوں میں آباد کار کے علاوہ دوسرے لوگ بھی ہلاک یا زخمی ہوتے رہتے ہیں اور اس طرح کے کئی واقعات رونما ہوچکے ہیں۔ ایک اور پہلو جو بیان کرنا ضروری ہے وہ یہ کہ مسلح تنظیمیں آباد کاروں کوبلا تمیز عہدہ و مرتبہ نشانہ بناتے ہیں یعنی ان واقعات میں حجام، خاکروب اور محنت و مزدوری کرنے والے افراد کو بھی بخشا نہیں جاتا۔گزشتہ دنوں (30اکتوبر) کیڈٹ کالج مستونگ کے درجہ چہارم کے ملازمین یونس اور منور کو کلاشنکوف سے فائرنگ کرکے قتل کردیا گیا ۔31اکتوبر کوبلوچستان بورڈ آف انٹرمیڈیٹ اینڈ سیکنڈری ایجوکیشن کے سیکرٹری حامد محمود کوقاتلانہ حملے میں شدید زخمی کردیا گیا جو اس وقت بھی زیر علاج ہے ۔ اس واقعہ کی ذمہ داری بلوچ لبریشن یونائیٹڈ فرنٹ نے قبول کرلی ۔

گویا کشت و خون کا بازار گرم ہے جبکہ وزیراعلیٰ کہتے ہیں کہ دیگر صوبوں کی نسبت یہاں حالات بہتر ہے اب اندازہ لگایا جائے کہ یہ نسبت ملک کے دیگر کس علاقے سے میل رکھتا ہے ؟ اور کالعدم مذہبی تنظیموں کی کارروائیاں اس کے علاوہ ہیں جس کی وجہ سے بھی بڑا نقصان اب تک واقع ہوچکا ہے ظاہر ہے کالعدم مذہبی تنظیموں کا نیٹ ورک ہنوز فعال ہے اور ان کی کارروائیاں آئندہ بھی ممکن ہیں۔ وفاقی اور صوبائی حکومت دونوں کی جانب سے بھارتی مداخلت کا دعویٰ کیا جاتا ہے لیکن اس دعوے کو سفارتی سطح پر بظاہر ثابت نہیں کیا جاسکا ہے ۔ نامعلوم کہ حکومت اس ضمن میں کس مصلحت کا شکار ہے جبکہ بھارت کے خیر خواہ تو بہت سارے ہیں امریکی وزیر خارجہ ہیلری کلنٹن نے پاکستان کے حالیہ دورے کے بعد بھارت کی وکالت اور دلالت کی ہے کہ امریکہ کو بلوچستان میں بھارتی مداخلت کے ثبوت پیش نہیں کئے گئے ہیں ۔ عالم یہ ہے کہ حکومت کا پیکج اور زخموں پر مرہم رکھنے کی نوبت تاحال نہیں آئی جبکہ زخم سڑ رہے ہیں ،دوریاں بڑھ رہی ہیں حکومت کو اگر این آر او ، چینی کے بحران اور دیگر معاملات سے فرصت ملے تو وہ ملک کی سالمیت اور استحکام پر توجہ دے ۔ حد یہ ہے کہ بلوچستان میں عدم تحفظ کی کیفیت میں لوگ شب و روز بسر کررہے ہیں ،کوئٹہ شہر کا کاروبار تباہ ہورہا ہے ،معاملات زندگی متاثر ہے ۔یہ حالات فوری پیش رفت اور توجہ کے مستحق ہے لیکن اس کی نزاکت پر توجہ نہیں دی جارہی ہے پیکج اگر بلوچستان کے مسئلے کا حل ہے تو اسے جلد سے جلد بروئے کار لایا جائے تاکہ صوبے میں امن اور قرار کی فضاءقائم ہو
۔حکومت اگر سنجیدگی کا مظاہرہ کرے تو بلوچستان میں علیحدگی کی بجائے وحدت کی سوچ پیدا ہوگی اور یہ نا ممکن بھی نہیں ہے بس ضرورت اخلاص اور نیک ارادوں کی ہے جس کی اب تک کمی محسوس کی جارہی ہے ۔

سیستان حملہ، ایران کی قبل از وقت پاکستان پر الزام تراشی

ہم دیکھ رہے ہیں کہ عالمی شاطر اور دغا باز قوتیں جن کا سرخیل دو ر رواں میں یونائیٹڈ اسٹیٹ آف امریکہ ہے ،کو افغانستان میں واضح شکست کا سامنا ہے تاہم جاتے جاتے امریکی نیت کا فطور یہ بتارہا ہے کہ وہ پاکستان کو برباد کرنے کا تہیہ کر چکا ہے ملک کے اندر تو پاکستان کے دوستوں کو دشمن بنالیا گیا ہے سردست امریکہ پاکستان کو خطے میں تنہاءکرنے کی پالیسی پر بھی گامزن ہے ۔ممکن ہے یہ رائے درست نہ ہوتا تاہم گمان یہ کہتا ہے کہ پاکستان اور ایران کے درمیان غلط فہمیاں پیدا کرنے کی مکروہ سازشیں ہورہی ہیں ۔ سازشوں کے اس جال میں ایک مثال اتوار اٹھارہ اکتوبر کو ایران کے صوبے سیستان کے شہر زاہدان میں پاسداران انقلاب اور مقامی عمائدین کے مجلس میں خودکش بم دھماکہ کی پیش کی جاسکتی ہے جس میں چالیس سے زائد افراد بشمول پاسداران انقلاب کے اعلیٰ کمانڈرز ہلاک ہوئے ، اس حملے میں مقامی افراد بھی ہلاک ہوگئے گویا ان جان لیوا حملوں کے بعد فوراً بعد عوامی اورانقلابی ایرانی حکومت پاکستان پر برس پڑی اور چند ساعتوں کے اندر اندر امریکہ و برطانیہ سمیت پاکستان کی انٹیلی جنس اداروں کو مورد الزام ٹھہرایا ۔ مذکورہ ہلاکت خیز واقعہ کی ذمہ داری جنداللہ نامی عسکریت پسند تنظیم نے بلا توقف قبول کرلی تھی مگر پاکستان کے حوالے سے ایرانی حکومت کو ذرا تحمل اور محتاط رویہ اپنانا چاہیئے تھا ۔ ایران ایک ذمہ دار ملک ہے اور انہیں ذمہ داری کا مظاہرہ ہی زیب دیتا ہے یہ حقیقت منظم اور عوامی ایرانی حکومت پر روز روشن کی طرح عیاں ہے کہ پاکستان کی طرح ایران کی سرحدیں بھی اس طرح نہیں کہ ان پر ہمہ وقت پہرہ لگایا جاسکے ، پاکستان خاص کر بلوچستان کا افغانستان کے ساتھ طویل سرحدی جڑاﺅ کے باعث بہت ساری مشکلات کا سامنا ہے نیٹو اور افغان حکومت یہ الزام لگاتی ہے کہ پاکستان طالبان کو سپورٹ کررہا ہے اور سرحد پار کارروائیوں کے لئے بھیج رہا ہے اسی طرح انہیں طویل سرحدی پٹی کو بلوچ مزاحمت کار اپنےمقاصد کے لئے استعمال کررہے ہیں یعنی بلوچ عسکریت پسند آجاسکتے ہیں۔

یہ حقیقت ہے کہ بلوچستان اور کوئٹہ میں تخریبی کارروائیاں معمول کا حصہ بن چکا ہے چنانچہ کہنے کا مقصد یہ ہے کہ اسی المیہ اور مشکل سے مملکت ایران کو بھی سامنا ہے ایک جانب افغان سرحد اور دوسری جانب بلوچستان کے ساتھ طویل سرحد کے ساتھ جڑا ہوا ہے ۔ بلوچستان کے اضلاع چاغی، واشک، پنجگوراور تربت کے علاوہ پانی کے ذریعے گوادر سے بھی سرحد لگتی ہے اور یہ وسیع کے رقبے کے حامل اضلاع ہیں ۔دراصل جنداللہ کے کارندے پہاڑوں اور دشوار گزار راستوں کا انتخاب کرتے ہیں دوسری بات جو واقعی ناقابل فہم اور پیچیدہ نہیں ہے وہ یہ ہے کہ پاکستان کے صوبے بلوچستان اور ایرانی صوبے سیستان بلوچستان کے سرحد پر آباد بلوچ دوہری شہریت کے حامل ہے اگر شہریت نا بھی ہو تو سرحد کے آر پار آنا جانا ان لوگوں کے لئے کوئی مشکل عمل نہیں ہے دونوں اطراف کی آبادیاں باہمی رشتوں میں منسلک ہے ، خونی رشتے ہیں تہذیبی ارتباط موجود ہے حالانکہ ایران نے 2007 میں دہشت گردی کے خدشے کے پیش نظر سرحد پر 700کلو میٹر لمبی کنکریٹ کی دیوار تعمیر کرلی جس پر بلوچستان کی قوم پرست جماعتوں نے تحفظ کا اظہار بھی کیا ۔گویا اس تناظر میں یہ دعویٰ قبل از وقت ہے کہ پاکستان بھی ایران میں عدم استحکام کا خواہاں ہے اگر ایسا کچھ ہے تو ایرانی حکومت کی ذمہ داری ہے کہ وہ ان وجوہات اور محرکات کو بھی بروقت سامنے لاتی کہ پاکستان کیوں ایک آزاد ملک کو غیر مستحکم کرنا چاہتا ہے ۔ اگر چہ اس نوعیت کے الزامات ایران پر عوامی سطح پر لگ چکے ہیں کہ ایران پاکستان میں فرقہ واریت کو ہوا دے رہا ہے لیکن کوئی سنجیدہ فکر انسان اسے درست تسلیم نہیں کرے گا ۔تاہم یہ حقیقت ہے کہ افغانستان میں طالبان کی عناد میں مبتلا ایران نے بغض معاویہ میں شمالی اتحاد کو گلے رکھا تھا یہاں تک کے نائن الیون کے واقعہ کے بعد ایران بھی امریکہ کے ذریعے طالبان حکومت کے خاتمے اور انہیں ملیا میٹ کرنے کا خواہاں تھا بلکہ افغانستان پر امریکی کود تا میں جہاں پاکستان نے تابعداری کا مظاہرہ کیا وہیں ایران نے شمالی اتحاد کی افغان قوتوں اور تنظیموں کو ہر لحاظ سے کمک فراہم کیا ´افغانستان کے آج کی صورتحال میں ایران کی کوتاہیاں اور طالبان سے ازلی عناد کا بھی شامل ہے ۔غرضیکہ امریکہ نے افغانستان پر قبضہ کرلیا اور خطے میں مستقل پریشانی بے اطمینانی نے جڑ پکڑ لیا ۔یہی امریکہ اور برطانیہ بھوکے مگر مچھ کی طرح ایران کو بھی تاڑ رہا ہے لہٰذا اس پس منظر میں جنداللہ نامی عسکریت پسند تنظیم کی تار و پود اور کڑیاں پوشیدہ نہیں ہے جس کا اظہار جنداللہ کے سربراہ مالک ریکی خود کرچکے ہیں کہ ان کی امریکہ سمیت کئی ممالک کے سفراءسے ملاقاتیں ہوچکی ہیں ان کا کہنا ہے کہ سیاسی کو کامیابی سے ہمکنار کرنے کے لئے رابطے ضروری ہیں ۔عبدالمالک ریکی کا افغانستان آنا جانا رہتا ہے ، زاہدان بم دھماکے کے بعد پاکستان میں ایران کے سفیر ماشاءاللہ شاکری نے یہ الزام عائد کیا کہ جنداللہ کا سرغنہ عبدالمالک ریکی پاکستان میں ہے اسی طرح ایران نے پاکستانی سفیر کو دفتر خارجہ طلب کرکے خودکش حملے پر احتجاج کیا یہی نہیں بلکہ ایرانی صدر محمود احمدی نژاد نے یہاں تک کہا کہ انقلابی گارڈز پر خودکش حملہ کرنے والوں کو پاکستانی سیکورٹی ایجنسیوں کی معاونت حاصل تھی ساتھ احمدی نژاد نے مطالبہ کیا کہ اس حملے میں جنداللہ کے مددگاروں کو ایران کے حوالے کیا جائے اور ملزمان کو پکڑنے میں تہران کی مدد بھی کیا جائے اور ملزمان کو پکڑنے میں تہران کی مدد بھی کی جائے نیز ایران حکومت نے پاکستان سے از خود کارروائی کرنے کی اجازت بھی طلب کرلی ہے ۔ دریں اثناءترجمان دفتر خارجہ بلکہ صدر آصف علی زرداری نے ایرانی ہم منصب کو اس ضمن میں ہر ممکن تعاون کی یقین دہانی کرائی اور یہ باور کرایا کہ پاکستانی سرزمین ایران کے خلاف استعمال ہورہی ہے اور نہ ہی ہونے دیں گے ۔ دفتر خارجہ نے قرار دیا کہ کچھ عناصر پاک ایران تعلقات خراب کرنا چاہتے ہیں۔ وزیراعلیٰ بلوچستان نواب محمد اسلم رئیسانی نے اس حملے کے بعد کہا ہے کہ پاکستان بالخصوص بلوچستان کے عوام اور ایرانی حکومت اور وہاں کی عوام کے درمیان نہایت گہرے، تاریخی اور ثقافتی تعلقات قائم ہیں جو صدیوں پر محیط ہیں اور ایران و پاکستان کو دہشت گردوں کے خلاف مربوط لائحہ عمل طے کرنا چاہیئے .ایران کا یہ کہنا درست نہیں ہے کہ جنداللہ کو پاکستان یا اس کے اداروں کا تعاون حاصل ہے البتہ یہ کہنا غلط بھی نہیں ہے کہ جنداللہ کا سربراہ پاکستان میں موجود ہے یا موجود رہا ہے یہ حقیقت ہے کہ عبدالمالک ریکی صوبائی دار الحکومت کوئٹہ تک آتے رہے ہیں اب یہ حکومت اور اداروں کی ناکامی ہے کہ ان کی سرزمین پر ایسے لوگ پاﺅں رکھتے ہیں ۔ جنداللہ کے سربراہ عبدالمالک ریکی کو امریکہ برطانیہ اور افغان پھٹو حکومت کا تعاون حاصل ہے اور یہ امر ایران سے مخفی نہیں ہے ۔

یاد رہے کہ سال 2007کے ماہ اگست میں پاکستانی فورسز نے ایران سے ملحقہ بلوچستان کے علاقے مند کے پہاڑوں میں کارروائی کرکے اکیس سرکاری اہلکاروں کو طویل مقابلے کے بعد بحفاظت بازیاب کرالیا تھا ۔ ان افراد کو مند سے پچاس کلو میٹر دور ایران کے سرحدی صوبے سیستان وبلوچستان کے شہر چاہ بہار کے قریب سے اغواءکرلیا گیا تھا جن میں دو ایرانی سیکورٹی اہلکار بھی تھے ان دو اہلکاروں کو اغواءکاروں نے قتل کردیا تھا تاہم دیگر مغویوں کو پاکستان کی حدود میں لے آئیں ۔ اس واقعہ کے بعد ایرانی حکومت نے حکومت پاکستان بروقت اطلاع دی جس پرسیکورٹی فورسز نے فوری طور پر اغواءکاروں کے خلاف کارروائی شروع کردی اس طرح مقابلے کے بعد مغویوں کو بازیاب چھڑالیا گیا اور17 اغواءکاروں کو حراست میں لے لیا ان افراد سے بھاری مقدار میں اسلحہ وگولہ بارود برآمد کیا گیا ۔ تفتیش کے بعد ملزمان نے جنداللہ سے تعلق کا انکشاف کیا ۔ کہا جاتا ہے کہ ان ملزمان میں ایک شخص عبدالمالک ریکی کا بھائی بھی تھا بعد ازاں حکومت پاکستان نے نہ صرف مغویوں کو با عزت طور پر ایرانی حکومت کے حوالے کردیا جو اپنے ملک بحفاظت پہنچ گئے بلکہ ملزمان کو بھی ایرانی حکومت کی تحویل میں دیا لہٰذا یہ تعاون بظاہر یہ بتاتا ہے کہ پاکستان ہر گز عسکریت پسندوں کو ایران کے خلاف استعمال نہیں کررہا کیونکہ اگر ایسا ہوتا تو یہ مذکورہ کارروائی عمل میں نہ لائی جاتی اور نہ ہی ایرانی سرکاری اہلکاروں اور ملزمان کو حکومت ایران کے حوالے کیا جاتا ۔ نیز عبدالمالک ریکی کے بھائی عبدالحمید ریکی کو بھی گزشتہ سال جون میں ایران کے حوالے کردیا تھا جو کہ اب بھی ایران کی تحویل میں ہے ۔ عبدالمالک ریکی کے بھائی کے لئے کوئٹہ اور صوبے کے مختلف علاقوں میں بلوچ نیشنل فرنٹ نے تحریل چلائی ان کے اصل نام کی بجائے اسے غلام حیدر رئیسانی کے نام سے پکارتے تھے اپنے مظاہروں میں حکومت پاکستان پر الزام لگاتے تھے کہ وہ بلوچستان کے شہری کو غیر قانونی طور پر ایران کے حوالے کررہا ہے اور ساتھ ان کا اب تک الزام یہ بھی ہے کہ ایرانی بلوچوں کے ساتھ ظلم روا رکھا جارہا ہے ، انہیں حقوق کی آواز بلند کرنے کی پاداش میں سولی پر لٹکایا جاتا ہے ۔ بلوچ نیشنل فرنٹ اور عبدالمالک ریکی کے تعلق کو نظر انداز نہیں کیا جاسکتا ہے اور یہ پہلو بھی مد نظر رہے کہ عبدالمالک ریکی اور بلوچ مزاحمت کاروں کے درمیان رابطہ کی بازگشت بھی سنی گئی ہے بلکہ ایک مرتبہ تو عبدالمالک ریکی اور بعض بلوچ قوم پرستوں کی جانب سے ایران و پاکستان کے بلوچوں کے حقوق کے لئے جدوجہد کی باتیں بھی سنی گئیں یہ بات غور طلب ہے کہ قوم پرست خیالات کے حامل تنظیموں اور مذہب کی پرچارک تنظیم کے سربراہ کے تعلقات تعلقات کار کس نوعیت کے ہیں ۔ یقینی بات ہے کہ بلوچستان کے عسکریت پسندوں کو افغانستان سے کمک چل رہی ہے ،بھلے وہ انکار کریں لیکن حقیقت یہی ہے کہ کیونکہ اس کے بغیر ان کی مسلح مزاحمتی تحریک چل نہیں سکے گی ۔خلاصہ کلام یہ ہے کہ ایران حکومت اپنے اس الزام سے رجوع کریں جو انہوں نے حکومت پاکستان پر عائد کیا ہے کہ مالک ریکی کو ان کی سرپرستی حاصل ہے ۔

سطور بالا میں یہ ذکر ہوچکا ہے کہ مالک ریکی پاکستان میں ضرورموجود ہوں گے جس کی تفصیل بیان کردی گئی ہے تاہم اختصار کے ساتھ یہ بیان کرنا بھیضروری ہے کہ مالک ریکی کی پیدائش بلوچستان کے ایران سرحد سے ملحقہ ضلع واشک کیتحصیل ماشکیل میں ہوئی ، ریکی قبیلے سے ان کا تعلق ہے جو کہ پاکستان اور ایران میںآباد ایک نمایاں بلوچ قبیلہ ہے ۔ انہوں نے ابتدائی تعلیم ایران کے شہر زاہدان اوربعد ازاں کراچی کے مختلف دینی مدارس میں حاصل کی ہے ۔مالک ریکی نے2002ءمیں اہلسنتکے حقوق کے لئے ایرانی حکومت سے مطالبات منوانے کے لئے سیاسی جدوجہد شروع کی اورجنداللہ کے نام سے تنظیم کی داغ بیل ڈال دی جس کے بعد نامعلوم وجوہات کی بناءپر2003ءمیں ایرانی حکومت کے خلاف عسکری جدوجہد شروع کی۔

یہ تحریر تصویری شکل میں بھی پوسٹ کردی ہے

بلوچستان میں اساتذہ کا قتل عام ‘ حکومت کی نا اہلی اور انسانی حقوق کے علمبرداروں کی خاموشی

(یہ تحریر جولائی کے آخری ہفتے میں لکھی تھی تاہم مصروفیت کی وجہ سے بلاگ پر پیش نہ کرسکا ۔ )

۔۔۔۔۔۔۔۔۔
پاکستان پیپلز پارٹی کو جب 18فروری2008ء کے عام انتخابات میں کامیابی نصیب ہوئی تو اس کے بعد پی پی پی کے شریک چیئرمین نے پرویز مشرف کو بازعزت طریقے سے ایوان صدر سے رخصت کر دیا اور خود صدارت کے منصب اعلیٰ پر بیٹھ گئے اللہ انہیں بار بار عہدہ صدارت اور وزارت عظمیٰ کا عہدہ سنبھالنے کی توفیق عطاء کریں لیکن اس دعا کے ساتھ کہ یہ کلیدی عہدے ملک پاکستان کے شہریوں کے خون کے بدلے نصیب نہ ہوں جیسا کہ فاٹا مالا کنڈ ڈویژن مکیں امکریکی میزبانوں کی ہدایت پر کیا جا رہا ہے عوامی حکومت کو عوام کی خواہشات کو مقدم رکھنا چاہئے اور عوام کے سامنے جوابدہ ہونا چاہیئے افسوس ایسا ہو نہیں رہا یہاں مطلق تابعداری بارک حسین اوباما ، رچرڈ ہالبروک اور ہلری کلٹن کی ہورہی ہے جو پاکستان کے حدود میں ڈرون حملوں کی کامیابی پر نازاں ہیں ، ہیلری کلنٹن نے صاف لفظوں میں واضح کر دیا کہ نائب الیون کے واقعہ کے ذمہ داران پاکستان میں موجود ہیں لہٰذا اب آصف علی زرداری اور ان کے معتمد ین کی نہیں چلی گی اگر امریکہ اپنے شہریوں کے تحفظ اور عظیم ا مریکہ کی سلامتی کے لئے ان ا افرا دکے خلاف کار روائی مزید جاری رکھے گا مملکت پاکستان کے سند اقتدار پر بیٹھے 16کروڑ عوام کے نمائندے عمدہ طریقے سے تعاون نہ بھی کریں تب بھی امریکہ بہادر کو کسی کی محتاجی اور کمک کی ضرورت نہیں ہے کیونکہ وہ بے خبر بھی نہیں ہے انہیں پاکستان کے چپہ چپہ سے واقفیت اور آگاہی حاصل ہے تاہم پھربھی حکمران طبقہ پابند ہے کہ وہ اپنے آقا کی جی حضوری میں کسی تساہل، کوتاہی اور نا فرمانی کے ارتکاب کا مظاہرہ نہ کریں ۔ہاں تو2008کے عام انتخابات کے مابعد جناب آصف علی زرداری نے بلوچستان کے عوام سے پرویز مشرف دور کی زیادتیاں تو کجا انہوں نے گزشتہ ساٹھ سالہ بدسلکیوں اور امتیازی رویوں و اقدامات پر علی اعلان معافی مانگ لی شاید اس میں پاکستان کے پہلے سول مارشل ایڈمنسٹریٹر ذوالفقار علی بھٹو مرحوم کا دور جمہوریت بھی شامل ہے کیونکہ بلوچ یہ کہتے ہیں کہ ذوالفقار علی بھٹو کی جمہوری حکومت نے پہلے پہل سردار عطاء اللہ مینگل کی حکومت 9ماہ بعد بیک جنبش قلم ختم کر دی تھی ۔ اس کے بعد سال 1973-74 میں ملٹری آپریشن کا آغاز کر دیا تھا ، ذوالفقار علی بھٹو مرحوم کی وزارت عظمیٰ میں بلوچستان میں کار روائی کا تذکرہ جب بلوچ بزرگوں اور سیاستدان سے سنتے ہیں تو یہ روادار ہو بہو پرویز مشرف کی دور حکمرانی کے حالات کا نقشہ پیش کرتا ہے گویا پاکستان کے پہلے سول مارشل لاء ایڈمنسٹریٹر اور 12اکتوبر1999 ء کو نواز شریف حکومت پر ’’کودتائ‘‘کرنے والے فوجی آمرپرویز مشرف کی اس خاص نوعیت کی حکمت عملی میں مماثلت پائی جاتی ہے بہر کیف صدر مملکت آصف علی زرداری معافی مانگ چکے ہیں مفاہمت اور مصالحت کا مژدہ سنا چکے ہیں قوم چشم بہ راہ ہے کہ امن ، خوشحالی ، اعتماد ارو عدم امتیاز کا دور کب شروع ہو گا؟ ویسے تو پیپلز پارٹی کی حکومت بننے کے بعد بہت جلد خوشخبری سننے کا اعلان کیا گیا لیکن عوام آج تک وہ خوشخبری سننے کے لئے ہمہ تن گوش ہیں ۔ وفاقی وزیر داخلہ رحمن ملک نے حال ہی میں پھر تکرارواعادہ کیاکہ بلوچستان کے حوالے سے حکومت دو سے چار ہفتوں میں قوم کو خوشخبری دے گی۔ قوم چار ہفتے کیا مزید دس ہفتے انتظار کرے گی بس حکومت خوشخبری سنادے کیونکہ بلوچستان کی صورتحال تشویشناک ہے ۔ حالت یہ ہوگئی کہ آئے دن معصوم و نہتے شہریوں کو گولیاں مار کر موت کی نیند سلادیا جاتا ہے صوبائی حکومت نے شہریوں کی جان و مال کے تحفظ کے لئے شہر کو فرنٹیئر کور کے کنٹرول میں تو دیدیا مگر اس کے باوجود شہریوں کا خون نا حق بہہ رہا ہے ۔ یہ واضح ہو کہ حکومت عوام ہی کو جوابدہ ہے ، لوگ نہ بھارت و افغانستان اور نہ ہی بلوچ مزاحمت کاروں سے حساب لیں گے بلکہ اقتدار کے خوبصوت اور پرآسائش ایوانوں میں بیٹھے بزعم خیش عوامی نمائندوں کے گریبانوں میں ہاتھ ڈالیں گے کیونکہ بھارت اورافغانستان کا پورا ملبہ ڈال کر تو حکومت پوری صورتحال سے بری الذمہ ہوجائے گی ۔آخر حکومت کے ذمے بھی تو کرنے کے کام ہیں وہ کام اور فرائض پورے کیوں نہیں کئے جاتے ؟۔یہ حضرات تو حکمرانی کے مزے لوٹ رہے ہیں مگر انتقام کی بھینٹ بے گناہ شہری بن رہے ہیں ، کوئٹہ شہر کا امن غارت ہو چکا ہے ، کاروبار تباہ ہو چکا ہے ، ٹارگٹ کلنگ کے واقعات میں انسانیت کے دشمن قوم کا قیمتی سرمایہ ضائع کر رہے ہیں یعنی اساتذہ قتل ہورہے ہیں کوئی شخص محفوظ نہیں چھپے چہرے جہاں چاہیں گولیوں سے کسی کا سینہ چھلنی کر دیتے ہیں گولی مار کربیجا اڑ ادیتے ہیں ان مظلوموں کی اہل خانہ حکومت وقت سے تحفظ کا سوال کرتے ہیں اور پوچھتے ہیں کہ تمہارے کرتوتوں کی سزا انہیں کیوں دی جا رہی ہے ؟ ۔ کیا پروفیسر غلام سرور کی موت غیر معمولی واقعہ نہیں ہے ؟ پھر کیوں حکمران ایک شریف و درویش معلم کی شہادت پر بے قرار نہیں ہوتے ۔ پروفیسر غلام سرور سریاب پر واقعہ گورنمنٹ ڈگری کالج میں کمیسٹری پڑ ھاتے تھے ان کو نامعلوم افراد نے اپنے گھر کی چوکھٹ پر فائرنگ کر کے قتل کر دیا یہ واقعہ24جولائی کی رات نو بجے پیش آیا ۔ پروفیسر غلام سرور کا آبائی علاقہ رحیم یار خان ہے جس کی میت اگلے روز آبائی قبرستان میں تدفین کے لئے روانہ کر دی گئی۔ پروفیسر اینڈ لیکچرز ایسوسی ایشن نے اس المناک وقعہ کے خلاف 24 جولائی کو صوبے بھر میں کالجوں میں درس و تدریس کے عمل کا ایک روز کے لئے مقاطعہ کیا تین روزہ سوگ کا اعلان کیا۔ پروفیسر اینڈ لیکچرز ایسوسی ایشن کے صدر پوفیسر محمد نواز سرمو نے اپنے رد عمل میں کہا کہ ان کا تعلق ایک مقدس پیشے سے ہے اور کوئی استاد خود کو بچوں سے دور نہیں کرسکتا ہے کہ یہی ہماری زندگی کا مشن ہے ، ان کا کہنا تھا کہ بے حم لوگ ان کو مار رہے ہیں جو ان کے بچوں کو زیر تعلیم سے آراستہ کرنے والے ہیں ۔ بلوچستان ریذیڈنشل کالج خضدار بند ہو چکا ہے وہاں کوئی معلم جانے کو تیار نہیں ہے ، کالج کے طلباء تدریس کا آغاز چاہتے ہیں بے چارے احتجاج کر رہے ہیں ۔ خضدا رمیں جون کے وسط میں خضدار ریزیڈنشل کالج کے وائس پرنسپل خالد محمود بٹ کے قتل کا واقعہ پیش آیا تھا ، جون کے پہلے ہفتے ضلع مستونگ میں ای ڈی او ایجوکیشن اور پائلٹ سکول کے پرنسپل جاوید احمد لودھی کو مارا گیا ۔23جولائی کو سریاب روڈ پر واقع سریاب مل میں گورنمنٹ بوائز ہائی سکول کے وائس پرنسپل حاجی محسن انصاری صبح ا سکول کے گیٹ کے سامنے نامعلوم افراد کی فائرنگ سے جاں بحق ہو ا۔ا س سے قبل 22اپریل2008کو بلوچستان یونیورسٹی کے پرو وائس چانسلر پروفیسر صفدر کیانی کو یونیورسٹی کے قریب اپنے گھر کے ساتھ فائرنگ کر کے قتل کر دیا گیا تھا۔ان میں سے اکثر واقعات کی ذمہ داری بلوچ لبریشن آرمی نے قبول کی ہے ۔ بی ایل کے ترجمان کا یہ کہنا ہے کہ ڈگری کالج کے مقتول پرنسپل غلام سرور بلوچ قومی ترانہ کی راہ میں رکاوٹ بن رہے تھے اس لئے تمام اساتذہ کو یہ تنبہ کرتے ہیں کہ وہ بلوچ قومی ترانہ کی راہ میں رکاوٹ بننے سے گریز کریں ورنہ ان کا انجام غلام سرور جیسا ہو گا۔ یہ بھیانک سلسلہ مزید چلنے کے امکانات روشن ہیں ۔ سیاسی جماعتیں راست اقدام اٹھانے سے بوجہ عاجز ہیں ۔ انسانی حقوق کی تنظیموں نے گویا سرے سے کوئٹہ شہر اور صوبے کے دیگر علاقوں میں ٹارگٹ کلنگ اور انسانی حقوق کی بد ترین پامالی پر مطلق خاموشی اختیار کر رکھی ہیں ۔ انسانی حقوق کے نام نہاد علمبردار بشمول عاصمہ جہانگیر اینڈ کمپنی نری مناقفت کا عملی مظاہرہ کر رہی ہیں ذرائع ابلاغ پر گھنٹوں لفاظی فسق، منافقت اور ڈینگے مارنے والا یہ ٹولہ بے گناہ اور معّصوم لوگوں کے قتل پر کیوں خاموش ہے ؟ انہوں نے لبوں کو سی رکھا ہے ۔ یہ طبقہ امتیاز اور طبقاتی تقسیم کے لئے کوشاں ہے دراصل ان کا مشن بیرونی ایجنڈے پر عملدرآمد کے لئے ابلاغ کا کام کرنا ہے ۔ یقینی بات ہے کہ جو مر رہے ہیں ان کا مقدمہ ان کے سر پرستوں کے لئے غیر ضروری ہے ۔ عاصمہ جہانگیر ، کوئی ربانی کوئی برنی بھلے منافقت کا لبادہ اوڑ ھ کر ہی سہی محض ان بیواؤں اور یتیموں کو دلاسہ دینے تو آجائیں ۔ ہاں جماعت اسلامی بلوچستان کے ڈپٹی سیکرٹری جنرل زاہد اختر نے تو اپنی دانست میں عقدہ یہ کہہ کر حل کر دیا کہ کوئٹہ اور صوبے کے دیگر علاقوں میں آباد کاروں کو سرکاری ایجنسیاں مار رہی ہیں گویا زاہد اختر نے انسانی حقوق والوں کا بھی کام آسان کر دیا ہے انسانی حقوق والے بھی یہی رپورٹ ضبط تحریر کریں کہ آباد کاروں کے قتل کے واقعات میں سرکار کے ادارے ملوث ہیں ۔ دکھی خاندانوں سے ڈرامہ باز و مال متاع کے حریص حقوق انسانی والے فقط اظہار ہمدردی کریں حکومت سے تو کچھ ہو نہیں پا رہا معافی مانگ کر بھی بے شرمی سے تماشا دیکھ رہی ہے ، یاد رہے کہ بلوچستان کی صورتحال آصف علی زرداری کی حکومت کیلئے کلنگ کا ٹیکہ ہے پیپلز پارٹی کے نامہ اعمال میں دوسری بار آپریشن اور صوبائی حقوق کی پامالی لکھی جا چکی ہے ۔ اگر یہ سلسلہ پرویز مشروف کا شروع کیا ہوا ہے تو اس برائی اور خرابی کو پیپلز پارٹی دور کیوں نہیں کر رہی ؟حالات کیوں جوں کے توں ہیں ؟بہتری اور بناؤ کے آثار و امکانات دکھائی نہیں دے رہیں صاف مطلب یہ ہوا کہ حکومت چاہتی ہے کہ لوگ مسلح مزاحمت کرتے رہیں اورآزادی کا نعرہ بلند کر کے قومی پرچم کی بے حرمتی کرتے رہیں ۔
وفاقی وزیر داخلہ کا کہنا ہے کہ افغان صدر (کٹھ پتلی) حامد کرزئی نے انہیں بلوچ جنگجوؤں کے تربیتی کیمپ بند کرانے کی یقین دہانی کرادی ہے ۔صاحب! افغانستان میں اگر بلوچ جنگجوؤں کے تربیتی مراکز نہیں بھی ہیں تو افغان حکومت اس نوع کے مراکز قائم کرنے کا ارادہ رکھتی ہے لہٰذا ضرورت اس حقیقت کے ادراک کا ہے کہ ملک کے اندر ہی وہ اسباب پیدا کئے جائیں کہ کسی کو کسی عسکری تربیت کے حصول کی ضرورت ہی نہ پڑ ے ۔ سیدھا اور صاف راستہ یہ ہے صوبائی خود مختاری کے معروف فارمولے پر عمل کیا جائے مشکلات اور مسائل خود بخود حل ہوجائیں گے ۔

ہفتہ رفتہ کئی ناخوشگوار واقعات رونما ہو چکے ہیں ۔25جولائی کو مشرقی بائی پاس پر غیر ملکی مشروب ساز کمپنی پیپسی کے منیجر محمد طاہر میمن اور کمپنی کے ایڈمن آفیسر علی محمد ٹارگٹ کلنگ کا نشانہ بنے ۔ اسی روز منو جان پر پولیس موبائل پر دستی بم حملہ ہوا واقعہ میں ڈرائیور اور دو بچے زخمی ہوئے ۔اس واقعہ کے چند گھنٹوں بعد جیل روڈ پر نامعلوم افراد نے فائرنگ کر کے ایک سیکورٹی گارڈ کو ہلاک کیا ۔اگلے روز ( 26جولائی کو) جوائنٹ روڈ پر اتوار بازار پر چاول فروخت کرنے والے افراد پر نامعلوم لوگوں نے فائرنگ کی جس کے نتیجے میں ایک شخص ہلاک اور تین زخمی ہوگئے ۔پیش ازیں (21جولائی )نامعلوم افراد نے بلدیہ پلازہ سے سٹی تھانہ پر دستی بم سے حملہ کیا جو تھانے سے ملحق مارکیٹ میں گر کر پھٹا جس سے دکان میں موجودو تین خواتین اور مالک دکان زخمی ہوا ۔اسی روز دوپہر کے وقت کوئٹہ کے معروف تجارتی مرکز لیاقت بازار میں ایک چاٹ کی دکان میں بم دھماکے کا پیش آیا جو خواتین نے وہاں رکھ دیا تھا اس دھماکے میں

دو افراد زخمی ہوگئے تھے ۔

کیا حکومت اب بھی ہوش کے ناخن نہیں لے گی ؟

بلوچستان , غیر ملکی مداخلت

اخوندزادہ جلال نورزئی

jalal.nurzai@gmail.com
جب تک افغانستان پر سے امریکہ ، نیٹو اور بھارت کا منحوس سایہ نہیں ہٹتا اس وقت تک پاکستان بلکہ خطے میں ہمہ پہلو بہتری اور قرار نہیں آسکتا۔ افغانستان کی سرزمین پاکستان کے خلاف استعمال ہورہی ہے اس کی وجوہات میں سے ایک بڑی وجہ ملک کے طالع آزما حکمران طبقے کی غلام ذہنیت اور مفادات ہیں اور یہ حقیقت تاریخ کا حصہ بن چکا ہے۔ امریکہ کے لئے جو جنگ اب تک لڑی جارہی ہے ،وہ پاکستان کو اپنی لپیٹ میں لے چکا ہے لہٰذا اس پس منظر میں بھارت کے ”بہترین دماغ “پاکستان کے لئے مزید مشکلات مسائل سوچ رہے ہیں ،بلوچستان اس تناظر میں انتہائی اہم مورچہ ہے جہاں سے پاکستان پر کاری ضرب لگائی جائی جاسکتی ہے اور بلوچستان کی جانب سے حکومت کے لئے دشواریاں پیدا کی گئی ہیں چنانچہ ان حالات میں اگر حکمران طبقہ مخلص ہے تو کم از کم اغیار کے پنجوں سے بلوچستان کو نکال لیں کیونکہ علیحدگی پسندوں کو عوامی حمایت حاصل نہیں ہے لیکن اگر تاخیری حربوں اور لیت و لعل کا روایتی سلسلہ رہا تو آزاد بلوچستان والے کسی حد تک اپنے ارادوں کی تکمیل کے لئے آگے کا سفر کرسکتے ہیں ۔ بھارت نے بلا شبہ بلوچستان پر توجہ مرکوز کر رکھی ہے اور مداخلت کررہا ہے مگر ہمارے کند ناتراش حکمران طبقہ سفارتی جنگ لڑ نہیں پارہے ۔البتہ وزیراعظم پاکستان سید یوسف رضا گیلانی نے گزشتہ روز شرم الشیخ میں بھارتی ہم منصب من موہن سنگھ سے بلوچستان کے حوالے سے بات کی ہے بقول وزیراعظم گیلانی کہ بھارتی وزیراعظم کو بلوچستان میں مداخلت کے شواہد پیش کردیئے گئے ہیں اور یہ یقین دلایا ہے کہ جلد ثبوت بھی پیش کردیئے جائیں گے۔اور افغان صدر حامد کرزئی (کٹھ پتلی) سے بھی بات کرلی ہے مزید برآں وزیر داخلہ رحمن ملک نے کابل میں حامد کرزئی سے اس تناظر میںملاقات کی جو کچھ ہم تک میڈیا کے ذریعے پہنچا ہے وہ یہ ہے کہ رحمن ملک نے افغان صدر کو سوات اور فاٹا سے گرفتار افغان دہشتگردوں کے حوالے سے آگاہ کیا ہے اور بقول رحمن ملک کہ انہوں نے افغان صدر سے رحمن ملک کی حوالگی کا مطالبہ کیا جس پر افغان صدر نے تعاون کی یقین دہانی کرائی ہے ۔ضرورت اس امر کی ہے کہ یقین دہانیوں کی بجائے بروقت راست اقدام اٹھایا جائے جس تندہی کے ساتھ بھارت نے ممبئی واقعہ کے بعد اپنا سفارتی محاذ کھولا اور پوری دنیا میں پاکستانی مداخلت کا واویلا مچایا اور اپنی اس پروپیگنڈے میں بھارت کامیاب بھی رہا ہے تو کیوں نہ پاکستان حق بات کو جو ایک معروضی حقیقت ہے کہ دنیا کو سامنے پیش کریں اور بلوچستان میں اگر حکومت کے پاس شواہد او ر ثبوت موجود ہیں تو اس مسئلے کو بغیر کسی تاخیر کے عالمی سطح پر اٹھانا چاہیئے تاکہ افغانستان میں موجود قاض قوتوں کا تخریبی چہرہ عالم ِ انسانیت پر نمایاں ہوکیونکہ بالخصوص بھارت اپنے مذموم مقاصد اور عزائم کو بلوچستان میں پورا کرنا چاہتاہے دوسری طرف بلوچستان کے حوالے سے اب اسلام آباد کو سنجیدہ کا مظاہرہ کرنا چاہیئے کیونکہ بلوچستان کی سیاسی فضاءمفاہمت اور مصالحت کے لئے موافق ہے بس اس پر کام شروع کرنے کی ضرورت ہے قوم پرست جماعتیں شریک گفتگو ہوں گی وفاق اپنا اعتماد بحال کرے۔

بلوچستان نیشنل پارٹی(مینگل) بلوچ قومی سیاست میں انتہائی اہم کردار کی حامل جماعت ہے ، جماعت کے سربراہ سردار اختر مینگل، بزرگ بلوچ قوم پرست رہنماءسردار عطاءاللہ مینگل کے فرزند ہیں عطاءاللہ مینگل کی شخصیت اور بلوچ سیاست میں اہمیت سے کون انکار کرسکتا ہے کہنے کا مقصد یہ ہے کہ بلوچستان نیشنل پارٹی نے اندرون خانہ پارلیمانی سیاست کا ارادہ و فیصلہ کرلیا ہے ۔ بی این پی مینگل 26اگست2006 کو نواب بگٹی کی ہلاکت کے بعد اسمبلیوں سے باہر آگئی تھی ما بعد 18فروری2008ءکے عام انتخابات کا بھی بائیکاٹ کیا لہٰذا اب بی این پی نے دوبارہ انتخابی سیاست کی جانب مراجعت کا فیصلہ کرلیا یعنی سیاسی عمل اور گفت و شنید کا عمل اب تقویت اختیار کرے گا ۔اس طرح نیشنل پارٹی بھی قدر آور جماعت ہے اٹھارہ فروری کے انتخابات کا بائیکاٹ کیا لیکن جلد ہی انتخابی سیاست کے مقاطعے کا فیصلہ واپس لے لیا حالیہ سینٹ کے الیکشن میں پارٹی کے مرکزی سینئر نائب صدر حاصل بزنجو سینیٹر منتخب ہوئے۔نیشنل پارٹی کی سوچ معتدل ہے جسے بلوچ تعلیم یافتہ طبقے کی حمایت حاصل ہے حال ہی میں سینیٹر حاصل بزنجو نے آزاد بلوچستان کے نعرے کے ضمن میں اپنا موقف بیان کیا ان کا کہنا ہے کہ وہ گریٹر بلوچستان کے حامی نہیں ہے بلکہ ان کی جدوجہد صوبائی خود مختاری کے لئے ہے ۔حاصل بزنجو نے صاف لفظوں میں کہہ دیا ہے کہ وہ نوابزادہ براہمداغ بگٹی اور نوابزادہ حیربیار مری کی سیاست کی حمایت نہیں کرسکتا ۔ چنانچہ حاصل بزنجو نے 73ءکے آئین میں ترامیم کی بات کی ہے کہ نیشنل پارٹی اوردیگر بلوچ جماعتوں نے حکومت سے آئین میں ترامیم کا مطالبہ کیا تھا اگریہ ترامیم کرلی جاتی ہیں تو بلوچستان کا مسئلہ حل ہوسکتا ہے۔ اب حکومت کو آئین اور قانون کی زبان میں بات کرلینی چاہیئے ۔وہ آئین جس میں ذوالفقار علی بھٹو نے من پسند ترامیم کر ڈالی ،جس میں جنرل ضیاءالحق مرحوم کے اپنے اقتدار کی طوالت کے لئے ترامیم کیں ،وہ آئین جسے پرویز مشرف نے آمریت کو تحفظ دینے کے لئے اوپر نیچے کردیا تو اس میں صوبائی خود مختاری کے دیرینہ اور جائز مطالبے کے حوالے سے ترامیم پر سنجیدگی سے بیٹھ کر غورو خوض کی راہ میں کیا چیز مانع ہے ؟ حکومت یہ راستہ اختیار کرے ۔ پیپلز پارٹی کے رہنماءوزیراعلیٰ بلوچستان تو1940ءکی قرارداد کی بات کرتے ہیں اور مکمل صوبائی خودمختاری کے حصول کا اظہار انہوں نے متعدد بار کیا ہے ۔ اگر ایسا فی الواقعی ہوتاہے تو بہت جلد آزادی اور علیحدگی کی باتیں دم توڑ دیں گی اور بھارت شرمندہ رہ جائے گا ۔ اس حوالے سے گورنر بلوچستان نواب ذوالفقار علی مگسی کا کہنا بہت توجہ اور اہمیت کا حامل ہے جس میں گورنر نے علیحدگی کی سوچ کو یکسرمسترد کردیا ہے ۔

نواب ذوالفقار علی مگسی کے الفاظ من و عن اس طرح ہیں” ان (گورنر مگسی) کا مزاحمت کاروں سے کوئی رابطہ نہیں ہے ارو اگر کوئی شخص بلوچستان کوپاکستان سے الگ کرنے کا مطالبہ کررہا ہے تو میں ان سے پوچھنا چاہتا ہوں کہ وہ کس کی نمائندگی کررہے ہیں؟ کیا ان کو پشتون قوم ، ہزارہ قوم، آباد کار ، مگسی کا کسی اورقوم نے انہیں اس بات کا اختیار دیا ہے کہ وہ علیحدگی کا مطالبہ کریں ۔ براہمداغ بگٹی اور حیربیار مری کے بیانات سے بلوچستان کبھی الگ نہیں ہوگاپاکستان اوربلوچستان لازم و ملزوم ہیں بلوچستان میں علیحدگی کی کوئی تحریک نہیں ہے ایک یا دوافراد یا ایک جماعت کے کہنے سے بلوچستان الگ نہیں ہوسکتا‘‘۔

دوسری جانب وزیراعلیٰ بلوچستان نواب محمد اسلم خان رئیسانی بھی کہہ چکے ہیں کہ” حکومت مفاہمتی عمل کے لئے امن وامان کو داﺅ پر نہیں لگاسکتی ، مزاحمت کا راستہ اختیار کرنے والے مذاکرات شروع کریں ان سے ہر ممکن تعاون کیا جائیگا کیونکہ حکومت بلوچستان کے مسئلے کو سیاسی طریقے سے حل کرنا چاہتی ہے اور اس حوالے سے رضا ربانی کی قیادت میں قائم کمیٹی کام کررہی ہے اور جلد تمام فریقین کو اعتماد میں لیکر بلوچستان کے مسئلے کو حل کرنے کے لئے آل پارٹیز کانفرنس بلائی جائے گی“۔ وزیراعلیٰ بلوچستان صوبے کے وسائل پر اختیار چاہتا ہے ان کا کہنا ہے کہ ” ریکوڈک اور سیندک کے منصوبے بلوچستان کے حوالے کئے جائیں تاکہ انہیں ہم خود چلائیں‘‘ اسی طرح گوادر پورٹ پر اختیار حاصل کرنا وزیراعلیٰ کے پیش نظر ہے گویابات صوبائی خود مختاری کی ہے جو دینی یقینی نہیں بنائی جارہی ہے۔

بلوچستان کا مسئلہ افغانستان کی صورتحال سے مربوط ہوچکا ہے۔افغانستان پر قابض قوتوں کی موجودگی تک شائد یہ ڈورالجھی ہی رہے افغانستان کے جنوبی صوبے ہمند میں امریکی آپریشن ”خنجر“ جاری ہے آپریشن میں پاکستان کی کمک بھی شامل ہے اور پاکستان خوفزدہ بھی ہے کہ کہیں مجاہدین سرحد پار کرکے پاکستانی حدود میں داخل نہ ہو۔ سیکورٹی فورسز نے پاک افغان سرحد پر اپنے طو رپر حفاظتی بندوبست آپریشن خنجر سے قبل ہی کرلیا تھا لیکن حقیقت یہ ہے کہ اس قدر طویل اور دشوار گزار سرحد کو سیل کرکے پہرہ لگانا ان کی بس کی بات نہیں ہے ۔ وزیر داخلہ رحمن ملک فرماچکے ہیں کہ اسامہ بن لادن افغانستان کے علاقے کنڑ میں موجود ہیں اور وہیں سے پاکستان کے خلاف کارروائیاں کررہے ہیں آخر کیوں اسامہ بن لادن پاکستان کے خلاف کارروائیاں کررہا ہے اس پر وزیر داخلہ کو سوچنا چاہیئے ، اس کا مطلب تو یہ ہوا کہ امریکہ جو چاہے گا وزیر داخلہ اور ان کے بڑے چھوٹے دوست و مہربان وہیں کریں گے۔ وزیر داخلہ کو تشویش ہے کہ طالبان اسلحہ سمیت وزیرستان اور بلوچستان میں داخل ہورہے ہیں اور نیٹو سے کہا ہے کہ وہ پاک افغان سرحدپر اگر دیوار تعمیر نہیں کرسکتی تو کم از کم خاردار تار لگائے تاکہ جنگجو پاکستان میں داخل نہ ہوسکیں۔ دیوار کی تعمیر اور خار دار تار اب امریکہ اور نیٹو کے پیش نظر ضروری نہیں ہے طالبان اگر پاکستان میں داخل ہوتے ہیں تو اس سے بھی انہیں کوئی سروکار نہیں ہے بلکہ حقیقت یہ ہے کہ قابض افواج چاہتی ہیں کہ طالبان یا دوسرے جنگجو پاکستان ہی میں داخل ہو ان کا مقصد پاکستانی افواج کے ذریعے ان کے خلاف کارروائی کرنا ہے اور امریکہ چاہتا ہے کہ یہ جنگ پاکستان کی حدود ہی میں جاری رہے۔

حکمران طبقہ مزید معذرت خواہانہ طرز عمل ترک کردیں ،قومی مفاد پر سخت رویہ اپنا ئیں پورے ملک میں بیرونی سازشیں ہورہی ہیں اور بلوچستان میں کئی ممالک کی خفیہ ایجنسیاں کام کررہی ہیں افغانستان سے ان کے ذریعے اسلحہ اور دیگر سازو سامان بدامنی پھیلانے کے لئے پہنچایا جارہا ہے۔ وقت اور حالات کا تقاضا یہ ہے کہ جس کل جماعتی کانفرنس نوید سنائی جارہی ہے اسے جلد طلب کیا جائے اس شرط کے ساتھ کہ کانفرنس میں کم از کم بلوچستان نیشنل پارٹی مینگل اور نیشنل پارٹی کی موجودگی ضرور ہونی چاہیئے اور مذاکرات کا عمل اس وقت تک جاری رکھا جائے جب تک کہ فریقین کسی حتمی نتیجے پر پہنچ نہیںپاتے۔

بلوچستان عالمی طاقتوں کے نرغے میں

افغانستان میں اس وقت امریکہ سمیت دنیا کی بڑی طاقتیں موجود ہیں جنہوں نے کشت و خون کا بازار گرم کر رکھا ہے ، بے گناہ شہری جدید حربی ساز و سامان سے لیس دنیا کی منظم آرمی کی قیادت اور انتقام کا نشانہ بن رہے ہیں ،افغانستان امریکی مقبوضہ ہے مگر اس قبضہ گیری پر دنیا نے چپ سادھ لے رکھی ہے ، پاکستان کی دینی جماعتوں اور تحریک انصاف کو چھوڑ کر دیگر سیاسی جماعتوں نے اس جانب خاموشی اختیار کر رکھی ہے بزعم خیش قوم پرست جماعتیں نے دوغلا معیار قائم کر رکھا ہے بلکہ حقیقت یہ ہے کہ یہ جماعتیں خود کو افغانستان میں امریکہ کے ساتھ شریک اقتدار تصور کرتی ہیں، مغالطے اور فریب میں مبتلا ہیں حالانکہ امریکہ سے انہیں سوائے چند ٹکوں ،رسوائی ، شرمندگی اور ندامت کے کچھ نہیں ملے گا ، اگر واقعی ضمیر زندہ ہو ؟ ۔ امریکہ نے فاٹا میں عملاً جنگ شروع کر رکھی ہے ،امریکی جاسوس طیارے شہریوں کے چیتھڑے اُڑارہے ہیں لیکن یہ طبقات انگشت بہ لب ہیں ، اب اس جنگ کا دائرہ بلوچستان کے پشتون علاقوں تک پھیلانے کی منصوبہ گری کی جارہی ہے امریکہ کو عوامی تائید کا یقین دلایا جاچکا ہے ، اطلاعات محو گشت ہیں کہ سرکار نے اس ضمن میں ہوم ورک مکمل کرلیا ہے ممکن ہے کہ بہت جلد امریکی وفادار بلوچستان کو بھی میدان جنگ میں تبدیل کردیں اور یہ سارا الزام مذہبی جماعتوں کو دیدیا جائےگا حالانکہ مذہبی جماعتیں یہ باور کرارہی ہیںکہ صوبے میں طالبان کے تربیتی مراکز ہیں نہ ہی طالبان موجود ہیں مگر اس کے باوجود اگر محض امریکی خوشنودی ،خواہش اور حکم و ہدایت کے مطابق آپریشن کا آغاز کیا جائےگا تو اس کے نتائج ِبد کے لئے حکومت اور ان تمام جماعتوں اور قوتوں کو بھی تیار رہنا ہوگا اگر سابق سوویت یونین کے تالی چٹ یہ سوچتے ہوں گے کہ امریکہ ان کے سروں پر سونے کے تاج رکھے گا تو یہ ان کی خام خیالی اور نا فہمی ہے ،برعکس انجام یہ ہوگا کہ امریکہ کے یہ نئے یار اپنے لئے جائے پناہ ڈھونڈیں گے اور یہ ڈالر و دیگر منفعتیں ان کے کوئی کام نہ آسکیں گی ، یہ تسلیم کیوں نہیں کیا جاتا ہے کہ انگریزوں اور روسیوں کے بعد اب سرزمین افغانستان امریکی مقبوضہ ہے ، امریکہ سیاہ و سفید کا مالک ہے ۔افغانستان میں بیٹھ کر سب سے پہلا کام امریکہ کے پیش نظر پاکستان کو غیر مستحکم کرنا ہے ، ملک کی افواج اور عوام کو اپنے ہی ملک کے اندر متصادم کرنا امریکی چال کا نتیجہ ہے اور اس عمل کو جس قدروسعت دی جائے گی اس قدر پاکستان دلدل میں دھنستا جائے گا ۔پشتون نسل پرست جماعتیں عملاً امریکہ کی دست و باز بنی ہوئی ہیں۔28جون کو کوئٹہ میں بلوچستان نیشنل پارٹی (مینگل )کے زیر اہتمام منعقدہ جلسے سے بلوچ قوم پرست جماعت نیشنل پارٹی کے سینئر نائب صدر حاصل خان بزنجو نے خوب توجہ دلائی ۔کاش کوئی اپنے مفادات سے ہٹ کر اجتماعی مفاد کو مقدم رکھ کر اس پہلو پرسوچے ۔ حاصل بزنجو نے کہا کہ ”آج دنیا کی تمام بڑی طاقتیں بلوچستان کے آس پاس بیٹھی ہوئی ہیں ( اشارہ افغانستان) یہ طاقتیں دنیا میں جہاں بھی گئی ہیں وہاں بربادی کے سوا کچھ بھی نہیں ہوا اور ان طاقتوں کا سب سے بڑا ٹارگٹ افغانستان اور بلوچستان ہے چنانچہ اس وقت بلوچستان نیشنل پارٹی اورپشتونخوا ملی عوامی پارٹی کی قیادت پر بھاری ذمہ داری عائد ہوتی ہے اور انہیں سوچنا ہوگا کہ ان حالات میں اپنی ذمہ دار کس طرح پوری کریں “ سینیٹر حاصل بزنجو بھانپ گئے کہ امریکہ خطے میں کن مذموم مقاصد کے لئے طاقت کے زور پر آکر بیٹھ گیا ، بزنجو صاحب نے اس پہلو کی اپنی فہم کے مطابق نشاندہی کردی ہے مگر یہ کافی نہیں ہے بلکہ ضرورت اس امر کی ہے کہ ان کی جماعت نیشنل پارٹی صوبائی خود مختاری کے ساتھ ساتھ امریکی سامراج کے خود خوفناک ارادوں اور منصوبوں کے خلاف تحریک چلا کر رائے عامہ ہموار کریں ۔ سامراج کی نگاہیں بلاشبہ بلوچستان کے وسائل اور ساحل پر ہیں ،سامراج بلوچستان کی تزویراتی (سٹرٹیجک)حیثیت اور اہمیت سے آگاہ ہے لہٰذا یہ خطہ سامراج کے لئے سونے کی چڑیا ہے ۔اس جانب بلوچستان نیشنل پارٹی (مینگل )کو بھی وسیع نظری سے غور کرنا ہوگا کیونکہ حکومت کے خلاف تو سڑکوں پر احتجاج کا حق سب کو حاصل ہے مگر امریکہ اور نیٹو کے خلاف کسی کو ہونٹ ہلانے کی بھی جرات اور اجازت نہیں ہوگی ۔ پشتونخوا ملی عوامی پارٹی کا تو خیر امریکہ سے عقیدت اور اُنس ہے کیونکہ امریکہ نے ان کے مقبول افغانستان کو ترقی کی شاہراہ پر گامزن کردیا ہے اور وہاں ایک جمہوری آئین بناکر دیدیا ہے ۔ بات یہ ہے کہ افغانستان امریکی کالونی و مقبوضہ ہے جس کے بعد آئین اور ترقی کوئی معنی نہیں رکھتا ، جمہور کی رائے افغانستان میں سرے سے وجود نہیں رکھتی ،ایک ملک جہاں چالیس ممالک کی افواج موجود ہو ں،جہاں بزور شمشیر چند افراد کو اقتدار کے مسند پر لاکر بٹھا دیا گیا ہو وہاں کونسا آئین اور کس طرح کی جمہوریت ہوتی ہے؟۔حقیقت یہ ہے کہ افغانستان میں عالمی بد معاشوں نے توپ و تفنگ سمیت آکر ڈھیرا ڈال دیا ہے جس کو افغان حکومت کہا جاتا ہے وہ دراصل ان بدمعاشوں کی خدمت پر مامور ہیں یہ حضرات چاپلوسی کے علاوہ کسی بھی مسئلے پر رائے زنی کی قدرت بھی نہیں رکھتے ۔اگر امریکہ افغانستان سے بے مراد نکلتا ہے تو یہ جمہوریت کے امین اور آئین کے پاسدار دور بین میں بھی نظر نہیں آئیں گے۔ لب لباب یہ ہے کہ عوامی نیشنل پارٹی اور پشتونخوا ملی عوامی پارٹی خطے میں امریکی مفادات کے لئے رائے عامہ ہموار کرنے کے کام پر کاربند ہے ۔ بلوچ مسلح تنظیموں کو بھی بھارت اور امریکہ کے فریب سے بچنے کی ضرورت ہے کیونکہ سردست مفادات امریکہ کے ہیں اور امریکہ ہی جنگ لڑرہا ہے امریکہ نے اگر اس خطے میں پنجے گاڑ لئے تو پھر کسی کی بھی خیر نہیں ہوگی ، شائد حاصل بزنجو کے کہنے کا مقصد بھی یہی ہوتاہم نواب زادہ حیربیار مری نہ جانے کس خوش فہمی میں مبتلا ہے کہ وہ امریکی کی غلامی کو بہتر سمجھتے ہیں اور کہتے ہیں کہ ”کم از کم امریکہ تو ہمارا قومی تشخص ختم نہیں کرے گا جبکہ پنجاب ہمارے وسائل کو بھی لوٹ رہا ہے اور قومی تشخص کو بھی ملیا میٹ کررہا ہے جو خود امریکہ کا غلام ہے “۔ حیربیار مری کے اس جذباتی خیال پر صرف اتنا کہا جاسکتا ہے کہ اگر پنجاب بالادست اور وسائل لوٹ رہا ہے تو امریکہ اس سے بڑی برائی ہے امریکہ تو قوموں اور اس کے وجود کو صفحہ ہستی سے مٹانے کی کوشش بھی کرچکا ہے اور یہ عمل عراق میں اور ہمارے پڑوس افغانستان میں آج بھی جاری ہے ، ویتنام میں بدترین آرمی ایکشن،ہیروشیما اور نا گا ساگی پر ایٹم بم گرانے کا گھناﺅنا عمل نہیں بھولنا چاہیئے ۔ پاکستان کے سابق فوجی صدر پرویز مشرف کے مرہون منت امریکہ2001 سے اب تک افغانستان میں موجود ہے یہ تعاون حاصل نہ ہوتا تو شاید افغانستان کی صورتحال مختلف ہوتی اٹھارہ فروری2008 کے عام انتخابات کے نتیجے مییں بننے والی حکومت بھی اپنے پیش رو کی پالیسیوں کو جاری و ساری رکھنے پر مجبو رہے پاکستان اہم سپلائی لائن ہے امریکہ چاہتا ہے کہ کسی کا سہارا لئے بغیر خطے پر کنٹرول حاصل کرنے سے طویل منصوبوں کو کم مدت میں پایہ تکمیل تک پہنچایا جاسکتا ہے یقینا یہ امر مشکل ہے تاہم امریکہ پاکستان پر کنٹرول حاصل کرنے کا خواہاں ہے جس کے لئے پاکستانی فورسز کو ملک کے اندر الجھانا ان کے پیش نظر ضروری ہے کراچی چمن سپلائی لائن کی حفاظت کے لئے فکر مند ہے قلعہ بداللہ اور صوبے کے بلوچ علاقوں میں نیٹو کے لئے سازوسامان لے جانے والے ٹرالروں پر چند ایک حملے ہوچکے ہیں ،کون کررہا ہے اس بابت وثوق سے نہیں کہا جاسکتا تاہم اگر صوبے میں طالبان کی سرکوبی کے نام پر کسی قسم کی کارروائی شروع کی جاتی ہے تو لا محالہ اس کا شدید رد عمل پیدا ہوگا اور اس دوران کراچی چمن سپلائی لائن متاثر ہوگا اور اسی اثناءمیں امریکہ خود حملے شروع کردے گا ، انجام کیا ہوگا یہ معلوم نہیں ہے البتہ انتشار اور لاقانونیت کی عفریت پاکستان کے اس حصے کو بھی حصار میں لے لیگا اور اس کے آثار سرحدی علاقوں میں ہلمند کارروائی کے بعد کچھ کچھ دکھائی دینے لگے ہیں ۔ افغان صوبہ ہلمند میں اس وقت امریکہ چار ہزار آرمی کے ساتھ ویتنام کے بعد بڑی فوجی کارروائی میں مصروف ہے جس کا لازمی نتیجہ یہ برآمد ہوگا کہ طالبان دفاعی حکمت عملی کے تحت پاک افغان سرحد کا رخ کریں گے۔اس خطرے اور خدشے کے پیش نظرپاکستان کے فوجی حکام نے افغانستان کے ساتھ نوشکی ، چاغی اور چمن میں اپنی سرحدیں سیل کردیں اور طالبان کا راستہ روکنے کے لئے اپنی دانست میں تیاریاں مکمل کرلی ہیں ۔طالبان کو روکنا سرحدوں کو بند کرنے سے نا ممکن ہے یہ ایک فطری بات ہے کہ سینکڑوں کلو میٹر طویل سرحد پر کسی کے آنے جانے اور نقل و حمل روکنا فوج کے بس کی بات نہیں ہے لہٰذ ا طالبان اگر اپنی دفاعی حکمت عملی کے تحت پاکستان کی حدود میں گھسنے کی کوشش کریں گے تو امریکہ ان علاقوں میں ان کی سرکوبی کے لئے کارروائی کا آغاز کرے گا ۔ یہ جو ایک عرصہ سے بلوچستان میں ڈرون حملوں کی باز گشت سنائی دے رہی ہے شاید آئند چند عرصے میں یقین میں بدل جائے ۔ امریکی جاسوس طیاروں کے بلوچستان کے اندر کارروائی کا اندیشہ موجود ہے ۔ادھر منگل کے روز(3جون2009) بلوچستان کے ضلع قلات کے علاقے سوراب میں میں نیٹو سپلائی کنٹینر پر حملے کا واقعہ پر ہمہ پہلو غور کرنے کی ضرورت ہے ۔ اس واقعہ میں چار افرا دہلاک اور گیارہ زخمی ہوئے ۔ بم دھماکے کا واقعہ نیشنل ہائی وے پر موجود ایک ہوٹل کے باہر پیش آیا،سفید رنگ کی ایک آلٹو کار آکر رکی جس کے ساتھ ہی زور دار دھماکہ ہوا ، دھماکے سے ہوٹل ، چار دکانیں مکمل طور پر تباہ ہوگئیں تین ٹرالرز اور دو مزدور گاڑیوں کو نقصان پہنچا۔ ڈی آئی جی خضدار غلام رسول ڈومکی نے اس دھماکے کو خودکش قرار دیا ، اخبارات میں بعض عینی شاہدین سے متعلق چھپا ہے کہ گاڑی آکر رک گئی اور ایک شخص گاڑی سے اتر کر موبائل فون پر بات کررہا تھا اور جونہی اس نے گاڑی کا دروازہ بند کردیا تو دھماکہ ہوا بہر حال ٹارگٹ نیٹو کے لئے سامان لے جانے والے ٹرالر ہی تھے۔ پیش ازیں بھی ان علاقوں میں ٹرالروں پر فائرنگ کے واقعات رونما ہوچکے ہیں اور ایک ٹرالر ڈرائیور بھی ہلاک ہوا۔ پشتون قوم پرست کہتے ہیں کہ پاکستان افغانستان (مقبوضہ) میں مداخلت کررہا ہے تاکہ افغان حکومت کو غیر مستحکم کیا جاسکے ، حیرت ہے امریکہ افغانستان میں داخل ہے ان کے شر سے خواتین و بچوں سمیت کوئی بھی افغان محفوظ نہیں ہے اور الزام فقط پاکستان کو دیا جاتا ہے ضرورت اس امر کی ہے کہ افغان حریت پسند تنظیمیں مسلح جدوجہد کے ساتھ ساتھ افغانستان میں عوامی احتجاج پر توجہ مرکوز کریں تاکہ افغانستان کے اندر غیر ملکی افواج کے خلاف عوام منظم ہو اور سیاسی پلیٹ فارم سے سرزمین کی آزادی کے لئے عوامی سطح پر جدوجہد کیا جائے اس عمل سے رفتہ رفتہ افغانستان کے طول و عرض میں افغان عوام نامرد امریکہ اور نیٹو افواج کی واپسی اور خو د مختار افغانستان کا مطالبہ زور پکڑے گا ۔ عوام کے احتجاج سے قابض قوتوں کے داشتاﺅں کاچہرہ بھی بے نقاب ہوگا اس وقت تو عالم یہ ہے کہ طالبان ہی کو ظالم اور درندے باور کرایا جارہا ہے اور امریکی قبضہ گیری اور خون آشامی پر دنیا عالم نے خاموشی اختیار کر رکھی ہے لہٰذا افغان عوام کو ملک کی آزادی ، خود مختاری اور بقاءکے لئے کوچہ و بازار میں لکھنا چاہیئے، دنیا کی راست گو حریت پسند عوام افغانستان کی آواز میں ضرور آواز ملائیں گے۔